भोटेकोशी नदीमा आएको बाढीपहिरोपछि लामो समयदेखि सम्पर्कविहीन रहेका स्याङ्जाका आठ जनाका परिवारबाट डीएनए परीक्षणका लागि रगतको नमुना सङ्कलन गरिएको छ ।

जिल्ला प्रहरी कार्यालय स्याङ्जाका अनुसार सम्पर्कविहीनको अवस्था लामो समयसम्म पत्ता नलागेपछि परिवारका सदस्यबाट नमुना सङ्कलन गरिएको हो ।

सम्पर्कविहीन हुनेमा भीरकोट नगरपालिका–५ पकानका ७० वर्षीय कृष्ण अर्याल र उनकी श्रीमती राधा अर्याल, कालीगण्डकी गाउँपालिका–४ ताप्लेबेसीका गुरुदत्त पाण्डे, नुवाकोटको मैलुङ हाइड्रोपावरमा कार्यरत कालीगण्डकी–४ का ३० वर्षीय अमल्दार रोहन राना, चापाकोट नगरपालिका–१० का दिनामनी पंगेनी, इलाका प्रहरी कार्यालय टिमुरेमा कार्यरत वालिङ नगरपालिका–१४ का प्रहरी सहायक निरीक्षक समबहादुर थापा, भीरकोट नगरपालिका–२ का ३१ वर्षीय नेपाली सेनाका गणेश कार्की र कालीगण्डकी गाउँपालिका–३ का ५२ वर्षीय तिलक राना छन् ।

सम्पर्कविहीनमध्ये वालिङका प्रहरी सहायक निरीक्षक समबहादुर थापा र भीरकोटका गणेश कार्कीका परिवारबाट जिल्ला प्रहरी कार्यालय स्याङ्जामै डीएनए परीक्षणका लागि रगतको नमुना लिइएको छ ।

अन्य छ जनाका परिवारबाट भने काठमाडौंस्थित प्रहरी अस्पतालमा नमुना सङ्कलन गरिएको जिल्ला प्रहरी कार्यालय स्याङ्जाका सूचना अधिकारी प्रहरी नायब उपरीक्षक रमेशदत्त अवस्थीले जानकारी दिए ।

यसैबीच, कृष्ण अर्याल र राधा अर्याल दम्पतीको भने हिन्दू परम्पराअनुसार कुशको शव बनाएर अन्त्येष्टि गरिसकिएको छ । उनीहरूको काजकिरियासमेत सुरु भइसकेको परिवारले जनाएको छ ।