काठमाडौं । हृदयघातका कारण निधन भएका एमाले नेता सुवासचन्द्र नेम्वाङका छोरा सुहाङले पार्टीले बाबुको अपूरा सपना पूरा गर्नका लागि आफूहरुलाई आत्मबल प्रदान गर्ने विश्वास व्यक्त गरेका छन् ।

समवेदना प्रकटका लागि पार्टी उपाध्यक्ष विष्णु पौडेलसहित पुगेका नेताहरुलाई आभार व्यक्त गर्दै उनले बाबुले पूरा गर्न बाँकी रहेको कामहरु पूरा गर्न पार्टीले सपोर्ट र आत्मबल दिनेमा आफू विश्वस्त रहेको बताए ।

‘हजुरहरु यहाँ हामीलाई आत्मबल प्रदान गर्न आउनु भएकोमा म एकदम आभारी छु, हाम्रो परिवार आभारी छ । उहाँले गर्नुभएका र अब गर्नपर्ने धेरै कामहरुका लागि यसरी नै आत्मबल प्रदान गरिराख्ने र त्यसलाई सम्पन्न गर्न हामीलाई सपोर्ट र आत्मबल प्रदान गर्नुहुनेछ भन्न चाहन्छु,’– उनले भने ।

एमाले पार्टी पंति र राजनीति वृत्तमा पनि सुहाङले पिताको बाटो पछ्याउने आँकलन गर्न थालिएको छ । नेम्वाङकाे निर्वाचन क्षेत्रमा कहिल्यै उनी हारेनन् । उनकाे निधनपछि उपनिर्वाचनमा सुहाङले चासाे देखाएकाे बुझ्न सकिन्छ ।

सुहाङ पनि कानुन व्यवसायी हुन् । यद्यपि उनी अहिलेसम्म राजनीतिमा सक्रिय छैनन् । राजनीतिलाई पेशा नभएर सेवाको दृटिकोणले हेर्नुपर्ने उनको बुझाइ छ । एक अन्तर्वार्तामा उनले राजनीतिमा जान सकिने बताएका छन् ।