शनिबार निधन भएका पुतली बाजे (कलिन स्मिथ) लाई अन्तिम श्रद्धाञ्जलीका लागि पृथ्वीनारायण क्याम्पस परिसरमा राखिने भएको छ ।

पोखराका मेयर धनराज आचार्यका अनुसार सोमबार पूर्वान्ह १० बजेदेखि क्याम्पस स्थित पुतली संग्रहालयको प्रांगणमै उनको शव श्रद्धाञ्जलीका लागि राखिने भएको हो ।

मेयर आचार्यले स्व. कलिन स्मिथप्रति माया, सद्भाव र सम्मान प्रकट गर्न र अन्तिम बिदाई कार्यक्रममा सहभागी हुन अनुरोध गरेका छन् ।

मेयर आचार्यले भने– ‘जब उहाँ नेपाल आउनुभयो त्यसपछि नेपाल नै घर बनाउनुभयो । जीवनको ५७ वर्ष नेपाल र अझै पोखरा नै उहाँको घर बन्यो । नेपाली भएर मर्न पाउँ भन्ने चाहना राख्नुभएका उहाँको हामी र हाम्रो देशप्रति अगाध माया रह्यो । अन्तिम श्रद्धाञ्जलीका लागि आम पोखरेलीलाई म सहभागी हुनुहुन अनुरोध गर्दछु ।’

पृथ्वी नारायण क्याम्पसको अन्नपूर्ण संग्रहालयमा वैज्ञानिक रुपले पुतलीहरुको संरक्षण गर्ने व्यक्ति उनी नै हुन् । जहाँ उनको देह राखी श्रद्धाञ्जली अर्पण गरिँदैछ ।

पेटको रोगबाट ग्रसित स्मिथ लामो समयदेखि हरियो खर्क अस्पताल, पोखरामा उपचाररत थिए । जहाँ उनले शनिबार बिहान करिब ३ बजे ८७ वर्षको उमेरमा देह त्याग गरे ।

वि.सं.१९९३ मंसिर ९ मा बेलायतमा जन्मेका कलिन २०२२ माघमा ३० वर्षको उमेरमा पोखरा आएका थिए । उनले नागरिकता पाउन नेपाल छिरेको ५४ वर्ष कुर्नुपर्‍यो ।

२०७६ साल कात्तिक २९ गते मन्त्रिपरिषद् बैठकले स्मिथलाई सम्मानार्थ नागरिकता दिने निर्णय गर्‍यो । मन्त्रिपरिषदको उक्त निर्णय अनुसार २०७६ मंसिर १६ गते पुतली बाजेले कास्की प्रशासनबाट नागरिकता पाए ।

नेपाल सरकारबाट सम्मानार्थ नागरिकता पाउनेमा उनी भूगोलविद टोनी हेगन, सगरमाथा आरोही एडमन्ड हिलारी पछिका तेस्रा व्यक्ति बने । हरेक भेटमा जो कोहीसँग पनि पुतली बाजेले नेपाली नागरिक भएर मर्न पाउँ भन्ने इच्छा जाहेर गर्थे ।

“जीवन त नेपालमै बिताइयो, नागरिकता पाइयो भने नेपाली भएर मरिन्थ्यो, म क्रिश्चियन हुँ । तर मेरो लास सेतीमा जलाइदिनू है,” उनी भन्थे ।

उनले ४० जिल्लामा गएर करिव २५ हजार पुतली संग्रह गरी हरेकको नामकरण गरे । नेपालमा पाइने ६६० प्रजातीका पुतली मध्ये उनले करिव ५५० प्रजातीका पुतली भेट्टाए ।

बीबीसीले उनको बारेमा प्रकाशित गरेको लेखः

पुतली बाजे: ‘पुतली खोज्दै आएँ, नेपाली नागरिक भएर मर्न मन छ’

सम्बन्धित समाचारः

रहेनन् ‘पुतली बाजे’, ८७ वर्षमा अस्ताए