पोखरा । गत १० मंसिरमा पोखराको रानीपौवामा भएको भयानक दुर्घटनामा परी घाइते भएका १९ वर्षीय क्षितिज नेपालीको साढे ५ महिनापछि निधन भएको छ ।

कास्कीको माछापुच्छ्रे गाउँपालिका–३ घाचोक घर भई पोखराको नदिपुर बस्दै आएका क्षितिज रानीपौवामा हजुरआमालाई भेटेर मोटरसाइकलमा घर फर्कने क्रममा राति पौने ११ बजे स्कुटरसँग ठोक्किएका थिए । त्यसपछि उनी अर्को लेनमा बजारिँदा गुडिरहेको बस मुनि परेका थिए ।

क्षितिजको उपचारका लागि आवश्यक खर्च नहुँदा जीवन संकटमा रहेकै बेला पदम नेपाल लगायतको पहलमा क्षितिज बचाऔं अभियान सुरु गरियो । त्यसपछि अभियानले निरन्तर सहयोगको याचना गरी रकम संकलन गर्दै आएको थियो । करिब ६ लाख रकम संकलन गरी उपचार गर्दै आएको पदमले बताए ।

टाउकोमा गम्भीर चोटका कारण मस्तिष्कमै असर पुगेकोमा पोखरा स्वास्थ्य विज्ञान प्रतिष्ठान अन्तर्गत पश्चिमाञ्चल क्षेत्रीय अस्पताल पोखरामा उपचार भइरहेको थियो । उनको टाउकोमा ३ पटकसम्म अपरेशन गरिएको थियो ।

धेरै लामो समयसम्म होसमा नआएको उनको स्वास्थ्यमा क्रमिक रुपमा सुधार आइरहँदा टाउकोमा पानी जमिरहने समस्या देखिएको थियो ।

नयाँपुल, पोखरा हुँदै काठमाडौ चल्ने संजोग ट्राभल्सको ना ५ ख १२३ नम्बरको बसभित्र मोटरसाईकलको अगाडिको भागसहित च्यापिएका क्षितिजलाई घटनास्थलका स्थानीयले उद्धार गरेर पोखरा स्वास्थ्य विज्ञान प्रतिष्ठान पोखराको आकस्मिक कक्षमा लगेका थिए ।

क्षितिजको उपचारको शुरुवातको खर्च पनि अस्पताल लाने युवकले नै ब्यहोरेका थिए । टाउकोमा गम्भिर चोट लागेर अचेत अवस्थामा रहेका क्षितिजलाई तत्काल शल्यक्रिया गर्नुपर्ने भएपनि परिवारको अत्तोपत्तो नभएका कारण भोलिपल्ट सोमवार चार बजेमात्रै टाउकाको शल्यक्रिया गरिएको थियो ।

टाउकोमा रगत जमेका क्षितिजको त्यतिबेलै खप्परको हड्डी निकालिएको थियो । १२ को अध्ययन समाप्तिपछि पोर्चुगल जाने आवश्यक प्रकृया पूरा गरेर निश्चित भएको भिसाको पर्खाइमा बसेका छोरा क्षितिज साढे ५ महिना अस्पतालको बेडमै पल्टेर परलोक हुँदा बुवा तिलक नेपाली पीडाले बेचैन छन् । सानैमा आमाले छाडेर गएपछि हुर्काएका एक्लो छोरा सानै उमेरमा गुमेपछि परिवारमा बज्रपात भएको छ ।

सम्बन्धित समाचारः

स्कुटरसँग ठोक्किएपछि बसमा च्यापिएका युवकको उपचार खर्च अभावले जीवन संकटमा

पोखरा रानीपौवामा स्कुटरसँग ठोक्किँदा मोटरसाइकल चालक गम्भिर घाइते