पोखरा । सहकारी ठगी मुद्दामा अनुसन्धानका लागि कास्की प्रहरी हिरासतमा रहेका राष्ट्रिय स्वतन्त्र पार्टीका सभापति रवि लामिछानेविरुद्ध काठमाडौं जिल्ला अदालतले पनि पक्राउ पूर्जी जारी गरेको छ ।

काठमाडौं महानगरपालिका वडा १४ स्थित स्वर्णलक्ष्मी सहकारीको रकम अपचलन गरेको अभियोगमा छानबिनका लागि पूर्व गृहमन्त्री लामिछानेसहित २२ जनाविरुद्ध आइतबार पक्राउ पूर्जी जारी भएको हो ।

उक्त सहकारीको रकम पनि गोर्खा मिडिया नेटवर्कमा गएको पाइएको बताइएको छ । सोको अनुसन्धानका लागि गोर्खा मिडियाका पूर्व प्रबन्ध निर्देशक समेत रहेका लामिछाने, पूर्व संचालक पूर्व डीआइजी छविलाल जोशीसमेतलाई पक्राउ पुर्जी जारी भएको हो ।

ठिक १ महिनाअघि काठमाडौंबाट लामिछानेलाई पक्राउ गरी अनुसन्धानका लागि जिल्ला प्रहरी कार्यालय कास्कीको हिरासतमा राखिएको छ । त्यसअघि नै पक्राउ परेका जोशी पनि कास्की प्रहरी हिरासतमा छन् ।

उनीहरुलाई सहकारी ठगी, संगठित अपराधसहित सम्पत्ति शुद्धीकरण मुद्दामा समेत अनुसन्धान भइरहेको जिल्ला प्रहरी कार्यालय कास्कीले जनाएको छ । लामिछाने र जोशीलाई यसअघि बुटवलको सुप्रिमको रकम समेत अपचलन गरेको अभियोगमा पक्राउ पूर्जी जारी भएपछि रुपन्देहीस्थित जिल्ला सरकारी वकिलको कार्यालयमा बयान लिएर पोखरा फर्काइएको थियो ।