काठमाडौं । प्रधानमन्त्री केपी शर्मा ओलीले कम्बोडियाको टेलिकम कम्पनीमा साढे ३२ अर्ब रुपैयाँ लगानी गरेको भनी सामग्री सम्प्रेषण गर्ने नौ युट्युब च्यानल कारबाहीमा परेका छन् ।

प्रेस काउन्सिल नेपालले मङ्गलबार एक विज्ञप्ति जारी गर्दै दर्ता भएका र नभएका गरी कूल नौ युट्युब च्यानललाई कारबाही गरेको जानकारी दिएको हो ।

कारबाहीमा परेकामध्ये छ ओटा युट्युब च्यानल काउन्सिलमा सञ्चार माध्यमका रूपमा सूचीकृत रहेका छन् । काउन्सिलले ती च्यानललाई निर्देशन जारी गर्दै स्पष्टीकरण मागेको छ । बाँकी तीन युट्युब च्यानल र फेसबुक पेजलाई भने अनुसन्धान गरी कारबाही गर्न साइबर ब्युरोलाई पत्राचार गरिएको काउन्सिलले जनाएको छ ।

कारबाहीमा परेका च्यानलहरूमध्ये सूचीकृत रहेका लेकाली खबर, खबर बुलेटिन टिभी, न्युज इन नेपाल, रातोपर्दा टिभी, योहो टेलिभिजन एचडी र गुन्द्रुक न्युज छन् । सूचीकृत नभएका च्यानल तथा फेसबुक पेजहरूमा पूर्वी गर्जन मिडिया, सगरमाथा पाना र नेपाल लाइभ एचडी रहेका ​छन् ।

सोमबार मेडिकल व्यवसायी तथा सामाजिक अभियन्ता दुर्गा प्रसाईंले पत्रकार सम्मेलन गर्दै प्रधानमन्त्री ओलीमाथि विभिन्न आरोप लगाएका थिए । उनले आफ्ना आरोप प्रमाणित गर्न भन्दै केही कागजात सार्वजनिक गरेका थिए । साथै, उनले आफ्नो फेसबुक पेजमा पनि केही कागजात र भिडिओ पोस्ट गरेका थिए, जुन अहिले सामाजिक सञ्जालमा भाइरल भइरहेका छन् ।

कानुन विपरीत प्रधानमन्त्रीविरुद्ध भ्रामक समाचार फैलाउँदै सामाजिक नैतिकता र शिष्टाचारमा गम्भीर असर पुर्याउने गरी घृणा र द्वेष फैलाएको निष्कर्षमा केन्द्रीय अनुसन्धान ब्युरो (सीआईबी) पुगेको छ । विद्युतीय कारोबार ऐन, २०६३ अन्तर्गतको कसुर गरेको आरोपमा जिल्ला अदालत काठमाडाैंले दुर्गा प्रसाईंविरुद्ध पक्राउ पूर्जी जारी गरेको थियो ।

त्यसैअनुसार, सीआईबीले मङ्गलबार प्रसाईंलाई नियन्त्रणमा लिएको छ । थप अनुसन्धानका लागि उनलाई साइबर ब्युरोमा राखिएको छ ।