मङ्सिरमा मनाइने वडा तिहारका लागि खर्च जोहो गर्दै स्याङ्जा आइपुगेको राउटे समुदायको टोलीलाई आर्थिक सहयोग गरिएको छ ।

परम्परागत काठका सामाग्रीहरु बेचेर जीवन धान्ने समुदाय अहिले पेशा संकटमा परेपछि विभिन्न स्थानमा पुगेर खर्च जुटाउन सुर्खेतबाट आएका छन् ।

शुक्रबार स्याङ्जा आएको राउटे टोलीले जिविकोपार्जन गर्न समस्या रहेको आफ्नो दु:खेसो पोखेका थिए । स्याङ्जा आएको राउटे टोलिका अगुवा तथा मुखिया शेर बहादुर शाहीले आफ्नो समुदायले भोगेका समस्याहरु व्यक्त गरेका थिए । हरेक वर्ष जस्तै यस वर्षपनि चाडपर्व मनाउनका लागि सहयोग संकलन गरिरहेको उनको भनाइ छ ।

दु:खेसो पोख्दै सहयोगको अपेक्षा राखेको टोलीलाई जिल्ला प्रशासन कार्यालय स्याङ्जाको तर्फबाट प्रमुख जिल्ला अधिकारी सुनिता नेपालले पाँच हजार रुपियाँ प्रदान गरेकी थिइन् ।

यसैगरी, समुदायको अवस्था र समस्यामा केही हदसम्म राहत पुगोस् भन्दै पुतलीबजार नगरपालिकाले र स्थानीय व्यवसायी पार्वती गुरुङले उक्त टोलिलाई पाँच/पाँच हजार रुपियाँ आर्थिक सहयोग प्रदान गरेका थिए । स्याङ्जा आएको राउटे समुदायको टोलीलाई जिल्ला प्रहरी कार्यालय र रेडक्रस सोसाइटी स्याङ्जाले तथा विभिन्न व्यक्तिहरूले पनि सहयोग गरेका छन् ।

राउटे समुदायले नेपाल सरकारको तर्फबाट खान, बस्नमा निरन्तर सहयोगको अपेक्षा गरेको मुखिया शाहीले बताए । प्राप्त सहयोग रकमबाट राउटे समुदायको खाने, बस्ने प्रयोजनमा खर्च गरिने शाहीले बताए ।

नेपालको लोपोन्मुख आदिबासी समुदायमा राउटे समुदाय रहेको छ । उनीहरुको सुर्खेतमा ४६ घरधुरी छ भने करिब दुई सय राउटे रहेका छन् ।