नेपाल पत्रकार महासंघ गण्डकी प्रदेश समितिको नवनिर्वाचित कार्यसमितिको आइतबार पोखरामा शपथ ग्रहण तथा पदस्थापन गरिएको छ ।

गत २८ मंसिरमा भएको निर्वाचनबाट रमेश पौडेलको अध्यक्षतामा २१ सदस्यीय नयाँ कार्यसमिति निर्वाचित भएको थियो ।

गण्डकी प्रदेशका मुख्यमन्त्री सुरेन्द्रराज पाण्डेको प्रमुख आतिथ्यमा भएको समारोहमा निर्वाचन समिति संयोजक प्रेस स्वतन्त्रता सेनानी कोमलनाथ बरालले शपथ ग्रहण गराए ।

आगामी ३ वर्षका लागि नवनिर्वाचित उपाध्यक्षमा प्रकाश पौडेल, उपाध्यक्ष (महिला) मायाकुमारी अधिकारी, महासचिव जमुना वर्षा शर्मा, सचिव भविश्वर पाण्डे, सचिव (समावेशी) रोशनी गुरुङ र कोषाध्यक्ष रमेश बस्ताकोटी छन् ।

खुला सदस्यमा विजय नेपाल, गणेश पहारी, जनक श्रेष्ठ, छविलाल पाण्डे, श्रीकृष्ण सिग्देल, ध्रुवराज सुवेदी र रोशन लामिछाने निर्वाचित भएका थिए । सदस्य (महिला) मा ज्योति हमाल, सपना अधिकारी र रञ्जिता शर्मा, सदस्य दलितमा विजय नेपाली, सदस्य (आदिवासी जनजाति) मा पदम श्रेष्ठ र मञ्जुल शाक्य छन् । अल्पसंख्यक सदस्यमा सुन्दरकुमार थकाली निर्विरोध भएका हुन् ।

समारोहमा मुख्यमन्त्री पाण्डेले नवनिर्वाचित कार्यसमितिको कार्यकालको सफलताको शुभकामना व्यक्त गरे । उनले संघीयता र प्रदेशका नाममा धेरै गाली खानु परेको गुनासो गरे । उनले प्रदेशमा पहिले अनुभव हासिल गरेकाहरू अहिले केन्द्रमा हुँदा पनि संघीयताको पक्षमा नबोलेकोमा आश्चर्य प्रकट गरे । उनले सामाजिक सञ्जाल र मिडिया छुट्टाछुट्टै हुन् भन्ने कुरा बुझाउँदै जानुपर्ने बताए ।

मुख्यमन्त्री पाण्डेले आमसञ्चार विधेयक पारित भई प्रेस रजिस्ट्रार कार्यालय स्थापित भएको र पत्रकारको हकहितका लागि यो कार्यालय लागिपर्ने बताए ।

पत्रकारको बिमाको रकम बढाउँदै जाने उनले प्रतिबद्धता जनाए । पत्रकार महासंघमा संघीयता लागु नभएकोमा उनको थप चिन्ता थियो । ‘गण्डकीको समाचार अलि कम आएको छ । मैले राम्रो गरेको भए राम्रो लेख्नुस् । नराम्रो भए नराम्रो लेख्नोस् तर केही त केही लेख्नोस्,’ उनले पत्रकारलाई सुझाव दिए ।

गण्डकी प्रदेश प्रेस रजिस्ट्रार बिमला भण्डारीले रजिस्ट्रार कार्यालयले आफ्नो कार्यविधि निर्माण अन्त्यतिर ल्याएको बताइन् । पत्रकार महासंघ कास्कीकी निवर्तमान अध्यक्ष समेत रहेकी उनले भनिन्, ‘पत्रकार महासंघ परिवार हो, यहाँ कोहीसँग प्रतिस्पर्धा छैन । सबैसँग मिलेर अघि बढ्नुपर्छ ।’

पत्रकार महासंघ केन्द्रीय सचिव सोनी शर्माले सबैले संघीयताको मर्म अनुसार काम गर्नुपर्ने बताइन् । उनले विरोधका लागि मात्र विरोध नगरौं, सकारात्मक ढंगले कलम चलाउनुपर्छ भनिन् ।

महासंघ गण्डकी प्रदेश अध्यक्ष नारायण शर्माले पत्रकार महासंघको विधान अनुसार काम गर्नुपर्ने सुझाव दिए । उनले हरेक पत्रकारको १५ लाखको स्वास्थ्य बिमा व्यवस्था हुनुपर्नेमा जोड दिँदै संस्थागत र पत्रकारको क्षमता वृद्धिमा काम गर्नुपर्ने बताए । उनले पत्रकार शुद्धीकरणलाई निचोडमा लैजाने काम गरोस् भनी नयाँ समितिलाई शुभकामना दिए ।

नवनिर्वाचित अध्यक्ष रमेश पौडेलले निर्वाचनमा सहयोग गर्ने सम्पूर्णलाई धन्यवाद दिँदै यहाँ कसैले हारेको नभई जित नजिक पुगेको भनी बुझ्नुपर्ने बताए । उनले मूलधारका मिडिया बचाएर राख्नुपर्नेमा जोड दिँदै पत्रकारितालाई दिगो रूपमा बचाउन नयाँ पुस्तालाई आकर्षित गर्नुपर्ने बताए ।

महासंघ गण्डकीका निवर्तमान महासचिवसमेत रहेका अध्यक्षका प्रत्यासी गोविन्द सुवेदीले नवनिर्वाचित समितिलाई सफलताको शुभकामना दिँदै श्रमजीवी पत्रकारको हकहितमा सधैँ लागिपर्ने बताए ।

सो अवसरमा प्रेस रजिष्ट्रार नियुक्त बिमला भण्डारी, महासंघ सचिवमा निर्वाचित सोनी शर्मासमेतलाई सम्मान गरिएको थियो ।

महासंघका निवर्तमान उपाध्यक्ष दीपक भट्टराईले स्वागत गरेको कार्यक्रमको संचालन सचिव सुशीलबाबु श्रेष्ठ (कैलास) ले गरेका थिए । निर्वाचन समिति सदस्यमा अधिवक्ता बिबि विष्ट र मनोज घर्तीमगर थिए ।

यसैबीच, नवनिर्वाचित कार्यसमितिको पहिलो बैठक पनि बसेको छ । अध्यक्ष रमेश पौडेलको अध्यक्षतामा बसेको बैठकले अघिल्लो कार्यसमिति, निर्वाचन समितिसहित सम्पूर्णमा धन्यवादसहित आभार व्यक्त गरेको महासचिव जमुना वर्षा शर्माले बताइन् ।