काठमाडौं । प्रधानमन्त्री केपी शर्मा ओलीले आफू नेतृत्वको सरकार आगामी ०८४ सालसम्म टसमस नहुने दाबी गरेका छन् ।

शुक्रबारबाट सुरु भएको संघीय संसद्को हिउँदे अधिवेशनलाई सम्बोधन गर्ने क्रममा प्रधानमन्त्री ओलीले यस्तो बताएका हुन् ।

गायिका शान्तिरानी परियारले गाएको ‘म त ढलेँ, ढलेँ’ बोलको गीत स्मरण गर्दै प्रधानमन्त्री ओलीले विपक्षी दलका नेताहरूले सरकार आजै, अहिल्यै सरकार ढल्छ भनेर दिँदै हिँडेको प्रतिक्रियाप्रति आपत्ति जनाए ।

‘विपक्षमा रहेका साथिहरूले एउटा कुरामा आफूलाई बेर्थ्यै खेर फालिरहेको छ । सरकार ढल्छ, ढल्नै लाग्यो, पुस मसान्त, माघे संक्रान्ति आदी इत्यादी,’ प्रधानमन्त्री ओलीले भने, ‘एउटा गीत बजारमा अलि ढलेँ, ढलेँ, भन्ने अलि प्रचारमा छ । त्यस्तै, प्राय आम रुपमा राजनीतिक नेताहरूल् गाएको सुन्छु, ढल्यो, ढल्यो, ढल्यो । यो गीत मनोरन्जनका लागि पार्टी उत्सवमा सुहाउला । राजनीतिमा त्यति सुहाउँदैन ।’

प्रधानम्न्त्री ओलीले उक्त गीत मनोरन्जनका मञ्चमा सुहाउने भए पनि राजनीतिक मञ्चमा नसुहाउने दाबी गरे ।

‘अझै एक जना माननीयले यो गित श्लील भएन भनेको पनि सुनेको छु । यस्तो टिप्णी पनि छ । यस्तो गायन मनोरन्जनका मञ्चमा गाउन बन्द गरे हुन्छ । ०८४ सम्म सरकार टसमस गर्नेवाला छैन,’ प्रधानमन्त्री ओलीले भने ।

पार्टी टुक्र्याउने, भत्काउनेजस्ता खुद्रे कुराहरू सरकारको मेनुमा छैन

प्रधानमन्त्री ओलीले पार्टी भत्काउनेजस्ता विषय सरकारको ‘मेनु’मा नभएको बताए । ओलीले पार्टी विभाजन नगरिने भन्दै ढुक्क हुन आग्रह गरे ।

“पार्टी टुक्र्याउने, भत्काउनेजस्ता खुद्रे कुराहरू यस सरकारको मेनुमा छैन । ढुक्क हुनुस्, कांग्रेस एमालेसहितको यति बलियो सरकारको प्राथमिकता त्यस्तो हुन सक्दैन,” उनले भने ।

बारम्बार विश्वासको मत लिनुपर्ने अवस्थाबाट मुक्त भइएको छ

ओलीले संसद्समक्ष बारम्बार विश्वासको मत लिनुपर्ने अवस्थाबाट संसद् मुक्त भएको बताए ।

उनले भने, “गएको छ महिनामा हाम्रो संसदीय राजनीतिमा दोहो¥याउनु नपरेको एउटा सुखद पक्ष म यहाँ उल्लेख गर्न चाहन्छु, सत्ताको नाउँमा प्वाल पारेर फुत्त अर्कै डुङ्गा चलाउने र मुलुक एवं जनतालाई तिरस्कार गर्दै सत्ता–पत्ता खेलिरहने विद्रुप स्थितिमा अब रोक लागेको छ ।”

प्रधानमन्त्री ओलीले जनताको भरोसा र संसद्को दृढताले भरिएको आत्मविश्वास लिएर आफू सदनमा उपस्थित भएको उल्लेख गरे ।