पोखरा । आज फेब्रुअरी १४, प्रेम दिवस अर्थात् भ्यालेन्टाइन डे विश्वभर मनाइँदैछ । एक सातासम्म मनाइने भ्यालेन्टाइन सप्ताहको अन्तिम तथा सबैभन्दा महत्त्वपूर्ण दिनका रूपमा आज प्रेम जोडीले एकआपसमा उपहार आदान–प्रदान गर्दै माया साटासाट गर्ने चलन छ ।

पछिल्लो समय भ्यालेन्टाइन डे आउनु एक हप्ता पहिले नै सप्ताहव्यापी रूपमा यो दिवस मनाइने गरिन्छ । फेब्रुअरी ७ लाई रोज डे, फेब्रुअरी ८ लाई प्रपोज डे, ९ लाई चकलेट डे, १० लाई टेडी डे, ११ लाई प्रमिस डे, १२ लाई चुम्बन डे, १३ लाई हग डे र १४ लाई भ्यालेन्टाइन डे को रूपमा मनाउने गरिन्छ । विशेष गरी यो दिनलाई प्रेम प्रस्ताव राख्ने, प्रेम भाव प्रकट गर्ने र प्रेम सम्बन्धलाई अझ सुदृढ बनाउने अवसरका रूपमा लिइन्छ ।

युद्ध पिपासु र दम्भी प्रवृत्तिका रोम साम्राज्यका राजा क्लडियस द्वितीयले तेस्रो शताब्दीतिर आफ्नो शासनकालमा सैनिक सदस्यले बिहे गर्न नपाउने एउटा कठोर किसिमको सैन्य नियम जारी गरेका थिए । सेनामा भ्यालेन्टाइन नाम गरेका एकजना इसाई पादरी पनि थिए । जसले सैनिकले पनि प्रेम र विवाह गर्न पाउनु पर्ने भनेर नियम उलङ्घन गरेका थिए । सेनाका जवानहरूको विवाह गराएका थिए ।

यतिमात्र होइन उनले युवा जोडीहरूलाई सार्वजनिक स्थलमै सामुहिक विवाह कार्यक्रम गराएका थिए । यसपछि नियम उल्लघंन गरेको आरोपमा इसापूर्व २६१६ फेब्रुअरी १४ मा मृत्युदण्ड दिइएको थियो । यही दिनदेखि तिनै भ्यालेन्टाइनको सम्झनामा अमेरिका, युरोप अष्ट्रेलियालगायत इसाईबाहुल्य देशमा भ्यालेन्टाइन्स डे मनाउन थालिएको हो ।

पछिल्लो समय भ्यालेन्टाइन डे नेपालसहित विश्वभर पर्वकै रूपमा स्थापित भइसकेको छ ।