काठमाडौं महानगरपालिकाका शिक्षक-कर्मचारीले अब नियमित तलब पाउने भएका छन् ।

प्रमुख प्रशासकीय अधिकृत सरोज गुरागाईँ आज कार्यालय पुगेलगत्तै प्रशासकीय अधिकृत गुरागाईँले लामो समयदेखि रोकिएको शिक्षक-कर्मचारीको तलब निकासाका लागि तोक लगाइदिएका छन् । प्रशासकीय अधिकृतको अभावमा महानगरका शिक्षक-कर्मचारीले ३ देखि पाँच महिनासम्मको तलब पाएका थिएनन् ।

गुरागाईँ आज सहजरुपमा कार्यालय पुगे । हिजो विहीबार झैं उनलाई नगर प्रहरीले रोक्ने प्रयास गरेनन् । हिजो प्रशासकीय अधिकृत गुरागाईँ कार्यालय प्रवेश गर्न नदिन मेयर बालेन्द्र साहले नगर प्रहरी उतारेका थिए । तर, महानगरका कर्मचारी र अन्य जनप्रतिनिधिले उनलाई कार्यकक्षमा पुर्‍याएर हाजिर गराइ छाडे । महानगरकी उपमेयर सुनिता डंगोलले समन्वयकारी भूमिका निर्वाह गरेकी थिइन् ।

ह्वील लक खोलिए

प्रशासकीय अधिकृतको गाडीमा लगाइएको ह्वील लक पनि खोलिएको छ । मेयर बालेन्द्र साहको आदेशमा गाडीमा ह्वील लक गरिएको थियो । आजबाट गुरागाईँले यो गाडी प्रयोग गर्नेछन् ।