काठमाडौं । नागरिक उन्मुक्ति पार्टीका संरक्षक रेशम चौधरी पक्राउ परेका छन् ।

उनलाई कमलादीस्थित प्रज्ञा भवनबाट सादा पोशाकमा खटिएका प्रहरीले पक्राउ गरेका हुन् । चौधरीलाई त्यहाँबाट डिल्लीबजार कारागार लगिएको छ ।

जनमत पार्टी र नागरिक उन्मुक्तिबीच बुधबार एकता गर्ने तयारी थियो । त्यसकै लागि चौधरी कमलादी पुगेका थिए ।

टीकापुर घटनामा अदालतको फैसला कार्यान्वयनका लागि चौधरीलाई पक्राउ गरिएको काठमाडौं प्रहरीले जानकारी दिएको छ । टीकापुर काण्डका प्रमुख आरोपी चौधरी राष्ट्रपतिबाट कैद मिनाहा पाएर २०८० जेठ १५ गते जेलमुक्त भएका थिए । गणतन्त्र दिवसको अवसर पारेर प्रचण्ड सरकारको सिफारिसमा राष्ट्रपति रामचन्द्र पौडेलले चौधरीसहित ५०१ जना कैदीलाई माफी दिएका थिए।

टीकापुर घटनामा मारिएकामध्ये एक प्रहरी अधिकारी केशव बोहराकी पत्नी कैद माफी गराउने सरकारको कदमलाई चुनौती दिँदै सर्वोच्च अदालत पुगेकी थिइन्।

नाउपा अध्यक्ष रञ्जिता श्रेष्ठले चौधरी पक्राउ परेको कुरा आफूले पनि सुनेको बताउँदै यसबारे विस्तृत बुझ्ने प्रयास भइरहेको बताइन् ।