राष्ट्रिय युवा संघको अध्यक्षमा पराजय भएपछि सुमन पुरीले खुला प्रतिस्पर्धाको आस्था राख्ने युवाहरूको ठुलो जित भएको बताएका छन्।

बुधबार सामाजिक सञ्जालमा मतदाताहरूलाई धन्यवाद दिँदै पुरीले खुला प्रतिस्पर्धाको आस्था राख्ने युवाहरूको ठुलो जित भएको बताएका हुन्।

‘यसरी खुला प्रतिस्पर्धा हुनु नै राष्ट्रिय युवा संघ नेपालमा आस्था राख्नुहुने सबै सबै युवाहरूको ठुलो जित हो। यो यात्रामा म केवल पदको लागि होइन, विचार, मूल्य र परिवर्तनको पक्षमा उभिएको थिएँ। यात्राको हरेक पाइला हार होस् वा जित सङ्गठनमा आन्तरिक लोकतन्त्र बलियो बनाउने आधार बनेको छ र म गर्वका साथ भन्छु,’ उनले लेखेका छन्, ‘म त्यो प्रक्रिया र विचारको हिस्सा बन्न पाएँ, जनताको बहुदलीय जनवादलाई सङ्घमा उत्कृष्ट प्रयोग गर्नका लागि आवाज उठाए, जुन मेरो लागि जितभन्दा कम छैन। हामी सबैको यो कदमले सङ्गठनभित्र बहस, विकल्प र परिपक्वताको नयाँ ढोका खोलेको छ ।’

पुरीले विजयी साथीहरूलाई बधाई दिँदै सङ्गठनलाई अझ सशक्त र समावेशी बनाउन पनि भनेका छन्।