काठमाडौं : राष्ट्रिय स्वतन्त्र पार्टीले कवीन्द्र बुर्लाकोटी महामन्त्री र मनीष झालाई प्रवक्ता बनाएको छ।

शनिबार बिहान बसेको रास्वपा केन्द्रीय समितिको बैठकले यसअघि कार्यवाहक महामन्त्री रहेका बुर्लाकोटीलाई महामन्त्री र कार्यवाहक प्रवक्ता रहेका झालाई प्रवक्ताको जिम्मेवारी दिने निर्णय गरेको झाले जानकारी दिए।

शुक्रबार निर्वाचन आयोगमा रास्वपाको महामन्त्रीमा ढकाल रहेको अभिलेख सार्वजनिक भएको थियो। रास्वपाबाट कारबाहीमा परेका ढकालले निर्वाचन आयोगमा अभिलेखको विवरण अद्यावधिक भए नभएकोबारे सूचना माग गरेका थिए। त्यसको जवाफमा आयोगले भनेको छ,‘प्रस्तुत विषयमा तपाईँले यस आयोगमा मिति २०८२/०३/०४ मा दर्ता गर्नु भएको निवेदन माग बमोजिम राष्ट्रिय स्वतन्त्र पार्टी (रास्वपा)को केन्द्रीय समितिका पदाधिकारी तथा सदस्यको हेरफेर भएको विवरण मिति २०८०/१२/२० मा अद्यावधिक भएको र त्यसभन्दा पछि हालसम्म अद्यावधिक भएको अभिलेखबाट नदेखिएको ब्यहोरा आदेशअनुसार अनुरोध छ।’

डा. मुकुल ढकाल नै महामन्त्री भएको पत्र निर्वाचन आयोगबाट सार्वजनिक भएपछि रास्वपा केन्द्रीय समितिको बैठकले जिम्मेवारी हेरफेर गरेको हो।

रास्वपा आज तेस्रो वर्ष पूरा गरी चौथो वर्षमा प्रवेश गरेको छ। रवि लामिछानेको नेतृत्वमा २०७९ असार ७ गते राष्ट्रिय स्वतन्त्र पार्टी घोषणा भएपनि निर्वाचन आयोगमा असार १७ गते दर्ता भएको थियो। लामिछाने सहकारीको बचत रकम ठगेको अभियोगमा पूर्वपक्षका लागि रुपन्देही जिल्ला कारागारमा छन्।