सञ्चार तथा सूचना प्रविधि मन्त्री पृथ्वी सुब्बा गुरुङले आफ्नो एक वर्षे कार्यकालमा सरकार सञ्चालनको अनुभव हासिल गरेको बताउँदै अबको एक वर्षमा नेपाललाई प्रविधिमैत्री बनाउने प्रतिबद्धता व्यक्त गरेका छन्।

शुक्रबार कान्तिपुर सिटी कलेज (केसीसी) द्वारा आयोजित ‘केसीसी एक्जिबिट २०२५’ को उद्घाटन गर्दै मन्त्री गुरुङले सरकार प्रविधिको विकास र विस्तारमा केन्द्रित रहेको सुनाए। ‘सरकारमा आएको एक वर्ष अनुभव लिनमै बित्यो,’ उनले भने, ‘अब थप एक वर्ष काम गर्न पाएँ भने नेपाललाई प्रविधिमैत्री बनाउन सक्छौं।’

मन्त्री गुरुङले वर्तमान दशकलाई फाइभजी र आर्टिफिसियल इन्टेलिजेन्स (एआई) को युगको रूपमा व्याख्या गर्दै सरकारले यसै वर्षभित्र फाइभजी प्रविधि जडान गर्ने तयारी गरिरहेको जानकारी दिए।

उनले सरकारको डाटा सेन्टरको क्षमता सानो रहेको स्वीकार्दै त्यसलाई विस्तार गर्नुपर्ने र देशमा एउटा पनि आईटी पार्क नभएको अवस्था अन्त्य गर्न सरकारले काम गरिरहेको बताए।