पोखराको अग्रणी विद्यालय प्रतिभा माविले कक्षा १२ उत्तीर्ण भएका विद्यार्थीलाई आइतबार एक कार्यक्रम गरी सम्मान गरेको छ ।

राष्ट्रिय परीक्षा बोर्डले हालै प्रकाशन गरेको नतिजामा नेपालभरमा उच्चतम् जीपीए ३.९६ रहेकामा प्रतिभा माविका ९ जना छात्रछात्राले उक्त जीपीए प्राप्त गरेका छन् ।

व्यवस्थापन, होटल व्यवस्थापन र विज्ञान विषयमा उत्तीर्ण विद्यार्थीलाई सम्मान गर्दै विद्यालयले विद्यार्थीलाई यसपछिको अध्ययनबारे पनि मार्गदर्शन गरेको थियो ।

पोखरा महानगरपालिकाका मेयर धनराज आचार्यले कक्षा १२ को अहिलेको परिणामले सिंगो पोखराले गर्व गर्न पाएको बताए । विद्यालय, विद्यार्थी, शिक्षक र अभिभावकको मेहनतले गर्दा परिणाम उत्कृष्ट आएपनि त्यसको हकदार महानगर पनि हुने उनले बताए ।

कक्षा १२ मा असफल हुँदैमा वा कम अंक आउँदैमा कोही विद्यार्थी आत्तिन नहुने पनि उनले बताए । ‘विद्यालय तहमा बारम्बार असफल भएका विद्यार्थीले पनि विश्वविद्यालय तहमा उत्कृष्ट अंक ल्याउने गरेका छन् । त्यसैले अहिले कम अंक आउँदैमा वा असफल हुँदैमा हरेस खानु हुँदैन,’ मेयर आचार्यले भने ।

उत्तीर्ण विद्यार्थीलाइ अबको पढाईबारे सुझाउँदै मेयर आचार्यले पढ्ने विकल्प पर्याप्त रहेकोमा आफ्नो इच्छा, आकांक्षा, रुची अनुसार पढ्नुपर्ने बताए । ‘मनले जे भन्छ, त्यही विषय पढौं, बुवाआमा वा छिमेकीका लागि पढ्ने होईन । आफ्नो चाहना अनुसारको विषय पढ्दा पक्का सफल भइन्छ,’ उनले भने, ‘आफैले आफैलाई सोधेर पढौं । अहिले पढेको पढाईले कम्तिमा राज्यलाई केही न केही योगदान दिनुपर्छ ।’

स्नातक नगरी विदेश नजान पनि उनले विद्यार्थीलाई सुझाव दिए । विदेश गएर पढ्दै र काम गर्ने हो भने निकै सकस रहेको भन्दै मेयर आचार्यले भने, ‘कम्तिमा स्वदेशमा स्नातक तह पढेर जानुस् । १२ कक्षा पछि नेपालको सिमाना नै नदेख्नेगरी पर्दा लगाउने अवस्था नहोस् ।’

प्रतिभा माविका प्राचार्य किरण सापकोटाले अहिलेको नतिजाले विद्यालयको इतिहास रचिएको बताए ।

‘समग्रमा पोखराको १२ कक्षाको परिणाम अध्ययन गर्ने हो भने प्रतिभाको नतिजाले योपटक निकै नै फड्को मारेको छ । यो समग्रमा पोखराका लागि पनि गर्वको कुरा हो,’ उनले भने, ‘प्रतिभाले बारम्बार फरक फरक क्षेत्रमा इतिहास रचेको थियो । योपटक देशकै उत्कृष्ट रिजल्टमा आफूलाई हकदार सावित गरेको छ ।’

प्रतिभाबाट १२ कक्षा उत्तीर्ण गरेपछि गएका विद्यार्थीले विभिन्न प्रवेश परीक्षामा आफूलाई अब्बल सावित गराएको पनि उनले बताए । ‘अहिले प्रतिभाको सपनामा अझ अर्काे इट्टा थपिएको छ । प्रतिभामा सिकेको आत्मविश्वासले सबै विद्यार्थीको भविश्य उज्ज्वल बन्नेछ,’ उनले भने ।

प्रतिभा मावि संचालक समितिका अध्यक्ष नारायण पौडेलले प्रतिभाले हरेक वर्ष शैक्षिक क्षेत्रमा फरक पहिचान कायम गर्न सकेकोमा यो पटक त्यसले थप निरन्तरता पाएको बताए ।

‘प्रतिभाको इतिहासमा इट्टा थप्न यो पटक विद्यार्थीले ठूलो योगदान दिएका छन् । विद्यार्थीले कोरेको यो इतिहासलाई आगामी दिनमा निरन्तरता दिन विद्यालय अझ लाग्नेछ’ पौडेलले भने, ‘उत्कृष्ट शिक्षा प्रदान गर्नका लागि प्रतिभा सधैं तयार छ ।’