काठमाडौँ । सहकारी ठगी प्रकरणमा पुर्पक्षका लागि थुनामा रहेका  राष्ट्रिय स्वतन्त्र पार्टी (रास्वपा) का सभापति रवि लामिछानेले बिगो बराबरको धरौटी रकम बुझाएर रिहा हुन गरेको प्रयास विफल भएको छ । रुपन्देही जिल्ला अदालतले उनलाई थुनामै पठाउन आदेश दिएको हो ।

न्यायाधीश नारायणप्रसाद सापकोटाको इजलासले सोमबार यस्तो आदेश गरेको हो । रवि लामिछानेका तर्फबाट कानून व्यवसायी डा. नारायण घिमिरे, राजेन्द्र थापा र महेन्द्र पौडेलले बहस गरेका थिए भने नेपाल सरकारका तर्फबाट सहायक सरकारी अधिवक्ता सोमकान्त भण्डारी, प्रेमप्रसाद पौडेल, हिरालाल भोलन र दामोदर गौतमले बहस गरेका थिए ।

बुटवलस्थित सुप्रिम सहकारी ठगी प्रकरणमा गत चैत २५ गतेदेखि पुर्पक्षका लागि थुनामा रहेका रविले आफ्नो भागमा लगाइएको बिगो बराबरको २ करोड ७४ लाख ८४ हजार रुपैयाँ बैंक जमानत राखेर थुना बाहिरबाटै मुद्दाको पुर्पक्ष गर्न पाउनुपर्ने गरेको मागमा अदालतले उनलाई थुनामै पठाउने आदेश गरेको हो ।

जिल्ला अदालतले उक्त निवेदनमा ‘माग बमोजिम नहुने’ आदेश गरेसँगै रवि पक्षका कानुन व्यवसायी भने उच्च अदालतमा पुनरावेदन गर्ने तयारीमा छन् ।

रवि लामिछानेकै पक्षबाट अदालतमा बहस गरेका अधिवक्ता महेन्द्र पाण्डेले जिल्ला अदालतको निर्णयमाथि पुनरावेदनका लागि हप्तादिनमै उच्च अदालतमा जाने बताएका छन् ।

गत साउन १९ गते अदालतमा निवेदन दिँदै उनले आफू सहकारी ठगीमा संलग्न नभएको तर बचतकर्ताको रकम फिर्ताको सुनिश्चितताका लागि सहयोग गर्न तयार रहेको जिकिर गरेका थिए ।

यसअघि गत मंगलबार र बुधबार रवि आफैँले पेशी स्थगित गराएका थिए । यसपटक भने पेशी चढेसँगै उनको मागमा आदेश आएको हो ।

यसअघि न्यायाधीश प्रह्लादकुमार योगीले जिल्ला अदालतको शुरू मुद्दामा रविलाई एक करोड धरौटीमा छुट्न आदेश दिएका थिए ।

बुटबलको सुप्रिम सहकारीबाट विभिन्न व्यक्तिको नाममा ६४ करोड २९ लाख रुपैयाँ ऋण प्रवाह भएकामा रविको नाममा २ करोड ऋण प्रवाह भई कर्मचारी रोशनी गुरुङको नामबाट गोर्खा मिडियोमा डिपोजिट भएको थियो ।

जसलाई फर्जी कागजातका आधारमा निकालिएको ऋण भनी लामिछानेले आफ्नो संलग्नता अस्वीकार गर्दै आएका थिए । अभियोगपत्र अनुसार, सुप्रिम सहकारीबाट गोर्खा मिडिया प्रालिमा करिब साढे ६ करोड रुपैयाँ ऋण प्रवाह भएको देखिन्छ ।

रवि २०७७ साल कार्तिक २ गतेदेखि २० महिना गोर्खा मिडिया प्रालिमा आवद्ध भएर प्रवन्ध निर्देशक, सञ्चालक र शेयरधनीसमेत भएकाले सुप्रिम सहकारीमा भएको हिनामिनामा उनीमाथिसमेत मुद्दा चलेको हो ।

यता उनलाई निर्दोष भएको दाबीसहित रास्वपाले हस्ताक्षर अभियानसमेत चलाएको छ ।