काठमाडौं । नागरिक उन्मुक्ति पार्टी (नाउपा) ले सत्तापक्ष बस्ने जानकारी संसद् सचिवालयलाई दिएको छ ।

गत २२ असारमा पार्टीका सांसद गंगाराम चौधरीले सरकारलाई दिएको समर्थन फिर्ता लिएको र प्रतिपक्षीमा बस्ने भनेर निवेदन दिएको थियो ।

सोही अनुसार नाउपाका सांसदहरू प्रतिपक्षमा बस्दै आएका थिए ।

त्यसको ४५ दिनपछि हिजो अध्यक्ष रन्जिता श्रेष्ठले सत्तापक्षमा रहने जानकारीसहित संसद् सचिवालयलाई निवेदन दिएको संसद् सचिवालय स्रोतले बताएको छ ।

यो विषयमा आज बसेको कार्यव्यवस्था समितिको बैठकमा पनि छलफल भएको थियो ।

सत्ताधारी दलको बैठकमा उपेन्द्रले उपमहासचिव पठाए

बुधबार सत्ता गठबन्धनको बैठकमा जसपा नेपालका अध्यक्ष उपेन्द्र यादवले पनि उपमहासचिव रेखा यादवलाई पठाए ।

केपी ओली नेतृत्वको सरकार असफल भएको भन्दै समर्थन फिर्ता लिएका उपेन्द्रले  गठबन्धनको बैठकमा पार्टीको प्रतिनिधि पठाएका हुन् ।