मुलुकको कार्यकारी प्रमुखको कुर्सीमा पहिलो पटक महिलालाई बसाएको छ ।अति छिटो गरी भएको सत्ता उथलपुथलले नेपालको राजनीतिक इतिहासमा नयाँ अध्याय सुरु गरिदियो ।

सुशीला कार्की कार्यकारी प्रमुखमा पहिलो महिला बनेकी छन् । ७३ वर्षीया कार्की पहिलो महिला प्रधानन्यायाधीश पनि हुन् । उनले २०७३ असारदेखि २०७४ जेठसम्म प्रधानन्यायाधीशको भूमिका निर्वाह गरेकी थिइन् । सर्वोच्चको नेतृत्वको रुपमा पनि आफ्नो स्वभाव र शैली कायम राखेकै कारण उनीविरुद्ध महाभियोग दर्ता समेत भएको थियो ।

तत्कालीन प्रधानन्यायाधीश कल्याण श्रेष्ठले २०७२ चैत ३० मा उमेर हदका कारण अवकाश पाएपछि वरिष्ठताका आधारमा कार्कीलाई बाटो खुल्यो । तर उनी २०७३ असार २५ सम्म कायममुकायम भएर बस्नुपर्‍यो । भ्रष्टाचार तथा मानवताविरुद्धका मुद्दाहरूमा प्रत्यक्ष जोडिने कांग्रेस र मा‌ओवादीले आफूलाई प्रधानन्यायाधीश बनाउन नचाहेको उनको दाबी छ । यद्यपि, उनी प्रधानन्यायाधीश बन्छिन् । २०७३ असार २७ मा राष्ट्रपति विद्या भण्डारीबाट शपथ खाएर इतिहास रचेकी थिइन् ।