काठमाडौँ । नेपालमा भएको जेनजीको आन्दोलनको चर्चा विश्वभर भइरहेको छ । छिमेकी भारत र चीनका साथै अन्तर्राष्ट्रिय मिडियाहरुले यो समाचारलाई प्राथमिकताका साथ प्रकाशन-प्रसारण गरिरहेका छन् ।

नेपालमा जेनजीले सरकार ढलाएसँगै विश्वका विभिन्न देशमा विपक्षीहरुले सरकारलाई यस्तै चेतावनी दिन थालेका छन् । बंगलादेश र श्रीलंकामा भएको आन्दोलनको उदाहरण दिएर नेपालका जेनजीले यसअघि त्यस्तै चेतावनी दिने गर्थे ।

बंगलादेश र श्रीलंकामा भएका आन्दोलनको चर्चा नेपालमा सदनदेखि सरकारसम्म हुन्थ्यो । दलका ठुला नेतादेखि विद्यार्थीहरुले बंगलादेश र श्रीलंकाजस्तै हालत नेपालमा पनि हुनसक्ने चेतावनी दिने गरेका थिए । भदौ २३ र २४ मा भएको जेनजी आन्दोलनले त्यसलाई वास्तविकतामा परिणत गरिदियो ।

अहिले भारतमा त्यहाँ विपक्षी दलले सरकारलाई नेपालको अवस्था देखाएर चेतावनी दिन थालेका छन् । शुक्रबार विपक्षी गठबन्धन ‘इन्डिया’ले सामाजिक सञ्जाल एक्समा लेखेको छ, ‘अगर नेपाल की तरह भारत में भी नेताओं की पिटाई शुरू हो जाए तो कौन सबसे ज्यादा लात खायेगा ! बिना डरे बिंदास बोलो !’ (यदि नेपालजस्तै भारतमा पनि नेतालाई कुटाइ सुरु भयो भने सबैभन्दा बढी लात कसले खान्छन्, नडराई बोल्नुस् ।’)

जेनजी आन्दोलन भएकै दिन विहारको विपक्षी दलका नेता तेजस्वी यादवले भनेका थिए, ‘नेपालको नजिक छ बिहार । डराएको होइन, सम्झाएको हो निर्वाचन आयोगलाई ।‘

भारतका एक जना अधिवक्ता नाजनिम अख्तरले भनेकी छिन्, ‘त्यो दिन टाढा छैन, जब यस्तो हालत भारतमा हुनेवाला छ । फेरि झोला उठाएर भाग्ने मौका पनि प्राप्त हुँदैन ।’

भारतको राजनीतिकर्मीदेखि युवामाझ पनि नेपालको घटनाको चर्चा भइरहेको छ । नेपालमा भएको घटनाका कारण भारतमा पनि सुरक्षा व्यवस्था कडा पारिएको छ ।