अर्थमन्त्री रामेश्वर खनालले चुच्चे नक्सासाथमा राखेर नेपालका लागि भारतीय राजदूत नवीन श्रीवास्तवसँग भेटघाट गरेका छन्।

नेपालको संविधानमा नै उल्लेख भएको र अन्तर्राष्ट्रियस्तरबाट समेत स्वीकार्य भइसकेको नेपालको उक्त नक्सालाई भारतले भने अहिलेसम्म मानेको छैन । नेपालले आफ्नो क्षेत्र भएको दाबी गर्ने लिपुलेक, लिम्पियाधुरा र कालापानी समेटिएको चुच्चे नक्साबारे भारतले आपत्ति जनाउँदै आएको छ । पछिल्लो समय चीनसँग भारतले नेपाली भूमि प्रयोग गर्ने व्यापारिक सम्झौता समेत गरेको थियो ।

निवर्तमान प्रधानमन्त्री केपी शर्मा ओलीले चीन भ्रमणका क्रममा उक्त भूमी नेपालको भएको र भारत चीनबीचको सम्झौता अस्वीकार्य रहेको बताएपछि विवाद थप बढेको थियो । सोही अडानका कारण ओलीको भारत भ्रमणसमेत अनिश्चित बनेको थियो । भारत भ्रमण नहुँदै प्रधानमन्त्री ओलीले राजीनामा दिए।

यसअघि भारतीय कुटनितिज्ञले नेपाल भ्रमणका क्रममा चुच्चे नक्सा सामुन्ने भेटघाट र वार्ता गर्न अस्वीकार गर्दै आएका थिए । चुच्चे नक्साबारे भारतको अडान कायम रहँदा अर्थमन्त्री खनालले मंगलबार आफ्नै कार्यकक्षमा नेपालको ठुलो नक्सा पछाडी राखेर राजदूत श्रीवास्तवसँग भेट गरेका हुन् । भेटमा भारत सरकार नेपालमा जेनजी आन्दोलनबाट बनेको सरकारलाई सहयोग गर्न तयार रहेको र विगतमा भइरहेका विकास निर्माणका कामहरु प्रभावित नहुने गरी सहयोगलाई निरन्तरता दिने बताएका थिए ।

मंगलबार नै चुच्चे नक्सालाई स्वीकार नगरको अर्को छिमेकी मुलुक चीनका राजदूतसँग पनि सोही नक्साअघि अर्थमन्त्री खनालले कुराकानी गरेका थिए ।