काठमाडौँ — अविरल वर्षाका कारण शनिबार बिहानदेखि देशका विभिन्न विमानस्थलमा हवाई सेवा पनि अवरुद्ध भएको छ। आन्तरिक उडानतर्फ काठमाडौँसहित कम्तीमा ६ वटा विमानस्थल बन्द हुँदा ती स्थानका लागि तोकिएका उडानहरू प्रभावित भएका छन्।

त्रिभुवन अन्तर्राष्ट्रिय विमानस्थल कार्यालयका अनुसार, खराब मौसमका कारण काठमाडौँ, भरतपुर, जनकपुर, भद्रपुर, पोखरा र तुम्लिङटार विमानस्थलमा उडान स्थगित भएका छन्।

यी विमानस्थलहरू बिहानैदेखि बन्द रहेका छन्। सुर्खेत विमानस्थल भर्खरै सञ्चालनमा आएको छ। तर काठमाडौँ विमानस्थल आन्तरिक उडानका जहाजका लागि बन्द भएपछि देशभरका सबै विमानस्थलको उडान प्रभावित भएका छन् । लुक्ला विमानस्थलमा भने बिहान सीता एयरको मात्रै एक उडान सम्पन्न भएको छ भने अन्य सबै उडानहरू मौसमी कारणले रोकिएका छन्।

शनिबारका लागि तय गरिएका माउन्टेन फ्लाइटहरू पनि पूर्ण रूपमा रद्द भएका छन्। यसमध्ये यति एयरलाइन्स र बुद्ध एयरका दुई-दुई वटा र श्री एयरलाइन्सको एक गरी पाँच वटा पर्वतीय उडान प्रभावित भएका हुन्। देशभरका विभिन्न गन्तव्यतर्फ शनिबारका लागि सूचीकृत उडान संख्या १ सय ४६ रहेको छ ।

जसमा बुद्ध एयरका ७३, यति एयरलाइन्सका ३२, श्री एयरलाइन्सका २३, सीता एयरका ७, समिट एयरका ४, तारा एयरका ३ र नेपाल वायुसेवा निगमका ३ उडान हुने तालिका छ । त्यस्तै, रामेछाप–लुक्ला सेक्टरमा सीता एयरले ५, तारा एयरले ६ र समिट एयरले ४ वटा उडान गर्ने तालिका रहेको छ ।

यद्यपि, काठमाडौँ विमानस्थल बिहान ६ बजेदेखि सञ्चालन हुनु पर्ने भए पनि खराब मौसमका कारण पहिलो उडान मात्र बिहान ७:१५ बजे सम्भव भएको थियो। दृश्यता कम भएकाले दिल्लीबाट आएको एयर इन्डियाको विमान अवतरण हुन नसकी ‘ओभर सुट’ भएको छ।

नेपाल नागरिक उड्डयन प्राधिकरणले यात्रुहरूलाई आफ्नो एयरलाइन्ससँग सम्पर्क गरी उडान अवस्थाबारे जानकारी लिएपछि मात्र विमानस्थल पुग्न आग्रह गरेको छ। विमानस्थलमा रहेको टर्मिनल डियूटी अफिस (टीडीओ) का अनुसार, काठमाडौँ को भिजिबिलिटी ३ हजार मिटर रहेको छ ।

काठमाडौँ विमानस्थलका महाप्रबन्धक हंसराज पाण्डेका अनुसार, जहाज उड्ने मार्गको मौसम प्रतिकूल भएकाले बिहान १० बजेसम्मका लागि आन्तरिकतर्फका सबै उडान स्थगित गरिएको छ।