काठमाडौं । जेन-जी आन्दोलनको करिब डेढ महिनापछि प्रधानमन्त्री सुशीला कार्कीको नेतृत्वको सरकार आइतबार तेस्रोपटक पुनर्गठन भएको छ ।

प्रधानमन्त्री कार्कीको सिफारिसमा राष्ट्रपति रामचन्द्र पौडेलले आइतबार दुई मन्त्री डा. सुधा शर्मालाई स्वास्थ्य तथा जनसंख्या र बब्लु गुप्तालाई युवा तथा खेलकुदमन्त्रीको शपथ गराए ।

प्रधानमन्त्री कार्कीले सुरुमा आइतबार राष्ट्रपति पौडेलसमक्ष चार जनाको नाम सिफारिस गरेकी थिइन् । तर खगेन्द्र सुनारको नाम विवादमा आएपछि काटियो । गणपतिलाल श्रेष्ठको पनि आइतबार शपथ भएन । प्रधानमन्त्री कार्यालय स्रोतका अनुसार श्रेष्ठले पर्यटन मन्त्रालयको आकंक्षा राखेका थिए । तर प्रधानमन्त्री कार्कीले उनलाइ भूमी मन्त्रीमा सिफारिस गरेकी थिइन् । जसमा श्रेष्ठले असन्तुष्टी जनाएको बताइएको छ ।

१२ जनासम्म मन्त्री बनाउने तयारी छ । बब्लु गुप्तालाई मन्त्री बनाएपछि जेन–जी आन्दोलनकर्मी र मधेशी समूदायको प्रतिनिधित्व भएको देखिन्छ । यसअघि मधेशी दलित समूदायबाट रामजी रामको नाम चर्चामा रहेपनि अहिले भने नाम समावेश छैन ।

युवा तथा खेलकूदमन्त्री बनेका गुप्ता सामाजिक काममा सक्रिय थिए । कोरोना महामारीका बेलामा विपतमा परेकाहरूलाई निःशुल्क खाना बाँड्नदेखि आर्थिक अभाव भएका व्यक्तिहरूलाई उनले कपडा बैंक अभियान चलाएका थिए । उनले ‘हण्ड्रेड ग्रुप’ स्थापना गरेर त्यसैमार्फत् विभिन्न कार्यक्रम गरिरहेका थिए ।

नवनियुक्त स्वास्थ्यमन्त्री डा. सुधा शर्मा त्यही मन्त्रालयबाट १४ वर्षअघि अवकाश पाएकी सचिव हुन् । त्यतिबेला मन्त्रीहरूसँग वैचारिक असहमतिका कारण राजीनामा दिएकी उनी केही समय राष्ट्रसंघीय नियोगहरूमा कार्यरत थिइन् ।