नेकपा (एकीकृत समाजवादी) औपचारिक रूपमै विभाजनको संघारमा पुगेको छ।

पार्टीले नेकपा (माओवादी केन्द्र) सँग एकता गर्ने प्रस्ताव बहुमतले पारित गरेपछि सम्मानित नेता झलनाथ खनालले पार्टी पुनर्गठन गर्ने वा नयाँ पार्टी बनाउने घोषणा गरेका छन्।

आज सकिएको नेकपा एकीकृत समाजवादीको केन्द्रीय कमिटी बैठकमा अध्यक्ष नेपालले पार्टी एकताको प्रक्रिया नरोकिने निर्णय सुनाएका थिए । खनालले भने भिन्न मत समेत राख्न पाएनन् ।

शुक्रबार सम्पन्न केन्द्रीय कमिटी बैठकमा अध्यक्ष माधवकुमार नेपालले प्रस्तुत गरेको एकता प्रस्ताव पारित भएलगत्तै नेता खनालले अध्यक्ष नेपालले एमालेबाट विद्रोह गरेर बनाएको पार्टीलाई अन्ततः माओवादीमा लगेर ‘विसर्जन’ गरेको आरोप लगाए।

‘एमालेसँगको विद्रोहका औचित्य पुष्टि नगर्दै पार्टीलाई माओवादीमा लैजाने जबर्जस्ती निर्णय गरियो’ उनले भने, ‘पार्टीलाई विसर्जन गरियो ।’

‘अब हामी अर्को पार्टी बनाउँछौं। हामी यही पार्टीका साथीहरू मिलेर नेकपा (एकीकृत समाजवादी) पुनर्गठन गर्छौँ, नभए नयाँ बनाउँछौँ,” खनालले सञ्चारकर्मीहरूसँग भने, ‘क्रान्तिकारी चेतना र जागरणसहितको पार्टी बनाउने छौं।’

उनले एमालेले गरेको घर फिर्तिको आह्वानलाई सकारात्मक रुपमा लिएको बताए । एमालेमा जाने विषयबारे उनले पार्टीको नीति सिद्धान्तमा सहमति हुनुपर्ने उल्लेख गरे ।