भण्डारी र कार्कीबीच आगामी निर्वाचन, देशको समसामयिक राजनीतिक अवस्थाबारे पनि छलफल भएको स्रोतले जानकारी दिएको छ ।

भेटपछि पूर्वराष्ट्रपति विद्यादेवी भण्डारीले आसन्न प्रतिनिधिसभाको निर्वाचन गर्न राम्रो तयारी गर्न सुझाव दिएको बताइन् ।

प्रधानमन्त्री कार्कीले उक्त घटनापछि उत्पन्न परिस्थितिका कारण आफूले जिम्मेवारी सम्हाल्नुपरेको जानकारी दिँदै सरकारले ती घटनाका विषयमा छानबिनलाई प्राथमिकतामा राखेर काम गरिरहेको बताइन् ।

भ्रष्टाचार नियन्त्रण र आगामी फागुन २१ गतेका लागि निर्धारित निर्वाचनको तयारीलाई समान प्राथमिकताका साथ काम गरिरहेको कार्कीको भनाइ छ । उनले पूर्वराष्ट्रपति भण्डारीसमक्ष निर्वाचनको वातावरण निर्माणका लागि आफ्नो ठाउँबाट भूमिका खेलिदिन पनि आग्रह गरेको प्रधानमन्त्रीको सचिवालयले जनाएको छ ।

त्यस्तै भेटवार्तापछि सञ्चार तथा सूचना प्रविधिमन्त्री जगदीश खरेलले सरकारले गरिरहेको कामका बारेमा प्रधानमन्त्रीले चर्चा गरेको र पूर्वराष्ट्रपति भण्डारीले फागुन २१ गतेको निर्वाचन सफलतापूर्वक सम्पन्न गर्न सुझाव दिएको बताए ।

जेन-जी आन्दोलनपछि बनेको सरकारले सुशासनका काममा गरेको काम सकारात्मक भएको प्रतिक्रिया भण्डारीको रहेका खरेलले सुनाए ।

मन्त्री खरेलले नेपालको पहिलो महिला प्रधानन्यायाधीश तथा प्रधानमन्त्री र पहिलो महिला राष्ट्रपतिबीच भेटघाट हुनु ऐतिहासिक भएको पनि बताए ।