नेकपा (एमाले) को ११ औँ महाधिवेशनबाट निर्वाचित पदाधिकारीमध्ये उपाध्यक्षमा निर्वाचित पृथ्वीसुब्बा गुरुङले सर्वाधिक मत प्राप्त गरेका छन् ।

गुरुङले १ हजार ७ सय ३७ मत ल्याउँदै पदाधिकारीमध्ये सबैभन्दा लोकप्रिय मत हासिल गरेका हुन् ।

उपाध्यक्षमा विजयी गुरुङले अध्यक्षमा तेस्रो पटक निर्वाचित केपी शर्मा ओलीभन्दा पनि बढी मत ल्याएका छन् । अध्यक्ष ओलीले १ हजार ६ सय ६३ मत प्राप्त गरेका थिए भने गुरुङले ७४ मत बढी ल्याएका हुन् ।

उपाध्यक्षमा गुरुङपछि उनैले नेता मानेका विष्णुप्रसाद पौडेल १ हजार ६ सय ७५ मत र रामबहादुर थापाले १ हजार ५ सय १६ मत ल्याएर निर्वाचित भएका छन् । त्यस्तै पोखरेल समूहबाट उम्मेदवार बनेका पूर्वसचिव गोकर्ण विष्ट १ हजार ३ सय ६८ मतसहित उपाध्यक्षमा विजयी भएका छन् । संस्थापन पक्षको सूचीमा नपरेपछि स्वतन्त्र उम्मेदवारी दिएका रघुजी पन्त पनि १ हजार २ सय ५८ मतसहित उपाध्यक्षमा निर्वाचित भएका छन् ।

१९ सदस्यीय पदाधिकारीमध्ये उपाध्यक्षमा सबैभन्दा बढी मत ल्याउँदै विजयी भएका गुरुङ पूर्वउपमहासचिवसमेत हुन् । उनको मत परिणामले पार्टीभित्र बलियो जनसमर्थन रहेको संकेत गरेको नेताहरूले बताएका छन् ।

अन्य पदाधिकारीतर्फ उपमहासचिवमा लेखराज भट्टले सबैभन्दा बढी १ हजार ४ सय ५२ मत प्राप्त गरेर निर्वाचित भएका छन् । सचिवमा महेश बस्नेतले १ हजार ५ सय ४४ मत ल्याउँदै सर्वाधिक मत पाएर विजयी भए । शंकर पोखरेल १ हजार २ सय २८ मतसहित सचिवमा निर्वाचित भए ।

महाधिवेशनको मत परिणामले एमालेको आगामी नेतृत्व संरचना र आन्तरिक शक्ति सन्तुलन स्पष्ट देखिएको विश्लेषण गरिएको छ ।