काठमाडौँ । शुक्रबार बुद्ध एयरको जहाज झापाको भद्रपुर विमानस्थलमा अवतरणका क्रममा रनवेबाट चिप्लिएको छ ।

काठमाडौँबाट भद्रपुर उडान भरेको ९ एन–एमएफ कलसाइन भएको एटीआर ७२ को विमान अवतरणका क्रममा रन–वेबाट चिप्लिएको हो ।

सो जहाजमा ५१ जना यात्रु रहेका थिए । विमानमा सवार यात्रु एवं चालक दलका ४ जना सकुशल रहेको बुद्ध एयरले जनाएको छ ।

त्रिभुवन अन्तर्राष्ट्रिय विमानस्थल टर्मिनल कार्यालयका अनुसार यो घटना ८ बजेर २० मिनेटमा भएको हो ।

यो बुद्धको अन्तिम उडान थियो । यो जहाज राति त्यहीं बसेर भोलि बिहान पहिलो उडानमा काठमाडौं फर्किने जहाज हो ।

काठमाडौंबाट गएको एटीआर धावनमार्गको एक जीरो विन्दुबाट अवतरण भएको थियो भने पूर्वतर्फ २८ नम्बर विन्दुबाट बाहिर गएको थियो । यो विमानस्थलको धावनमार्गको लम्बाई १५ सय मिटर रहेको छ ।

जहाज धावनमार्गको अन्तिम विन्दुबाट करिब डेढ सय मिटर अगाडि पुगेको छ । भौतिक पूर्वाधारमा कुनै क्षति भएको छैन । पानीको भेल बग्ने कुलेसोमा पुगेर जहाज रोकिएको छ ।

यो विमान चिप्लिएकाले भोलि (शनिबार) उडान हुने/नहुने टुंगो लागिसकेको छैन । भद्रपुर विमानस्थल प्रमुख किशोर कुमार खत्रीले प्राधिकरणसँग समन्वय गरेर उक्त जहाज निकाल्ने काम हुने बताए । जहाजमा के–कति क्षति पुगेको छ यसबारे बुद्धका इन्जिनियरले अध्ययन गर्नुपर्ने उनले जानकारी दिए ।