पोखरा । राष्ट्रियसभा सदस्यका लागि गण्डकी प्रदेशमा भएको निर्वाचनमा अन्य र महिला दुवै क्लस्टरमा काँग्रेस एमाले गठबन्धनका उम्मेदवारले जित हासिल गरेका छन् ।

राष्ट्रियसभा सदस्यमा गण्डकी प्रदेशबाट प्राडा जगत तिमिल्सिना र सम्झना देवकोटा विजयी भएका हुन् ।

आज भएको मतदानबाट नेपाली कांग्रेसबाट उम्मेदवार बनेका जगत अन्य कोटा र एमालेकी सम्झना महिला कोटाबाट सदस्य निर्वाचित भए ।

६०६९ मतभारमध्ये जगतले ५ हजार ३३ मतभार र सम्झनाले ५ हजार १४ मत पाए । निर्वाचनमा एमाले र कांग्रेसबीच गठबन्धन भएको थियो ।

गण्डकीका २२८ मतदतामध्ये २२३ मत खसेको थियो । मतदानमा सहभागी नभएकामध्ये राप्रपाका दुईजना सांसद र सत्ता गठबन्धनका तीनजना पालिका प्रतिनिधि छन् ।

कुल २ सय २८ मतदाता रहेको गण्डकीमा ५ जनाले मतदान प्रक्रियामा भाग लिएनन् । राप्रपाका दुई सांसद पन्चराम गुरुङ र विन्दु पौडेलले निर्वाचन बहिष्कार गरे । स्थानीय तहतर्फ तीन जना जनप्रतिनिधि वालिङकी उपमेयर कविता तिवारी, नार्पाभूमिका अध्यक्ष कोन्जो तेन्जिङ लामा र सहकारी ठगी प्रकरणमा हिरासतमा रहेका ढोरपाटनका नगर प्रमुख देवकुमार नेपाली अनुपस्थित रहे ।

यसरी हिसाब गर्दा सत्ता गठबन्धनका उमेदवारले पाँच हजार १०५ मतभार पाउनुपर्नेमा उनीहरूले मतभार कम पाएका हुन् ।

नेपाली कम्युनिस्ट पार्टीबाट गोमा लुइँटेल घिमिरे र कपिल लामा तथा राष्ट्रिय जनमोर्चाबाट लक्ष्मी बास्कोटा र शंकरप्रसाद बरालले उम्मेदवारी दिएका थिए ।

कांग्रेसनिकट प्राध्यापक संघबाट राजीनामा दिएर उम्मेदवार बनेका तनहुँका तिमिल्सिनालाई कांग्रेसका तत्कालीन सभापति शेरबहादुर देउवाले टिकट दिएका थिए ।

नेकपाकी गोमा लुइँटेल घिमिरेले ९ सय ४१ मतभारमा चित्त बुझाइन् । दुवै विधामा राष्ट्रिय जनमोर्चाका उम्मेदवारहरू शंकरप्रसाद बराल र लक्ष्मी बास्कोटाले समान ७६–७६ मतभार प्राप्त गरे ।