काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछानेले आफ्नो पार्टीबाट खराब व्यक्तिले चुनाव जितेको खण्डमा उनीहरूलाई पछि फिर्ता बोलाइने बताएका छन् ।

आफ्नो चुनावी अभियानका क्रममा चितवनमा रहेका उनले मतदातासामु यस्तो प्रतिबद्धता व्यक्त गरेका हुन् । एक कोणसभालाई सम्बोधन गर्दै उनले रास्वपाले बोक्नुपर्ने कुनै पनि व्यापारी वा व्यवसायी नरहेको बताए ।

लामिछानेले भने, ‘कुनै व्यापारी र बिचौलियालाई हामीले पोस्न पर्दैन । म आज यो चोकमा उभिएर भन्छु, यदि हामीले राम्रोसँग छान्न नपाएर, रोज्न नभ्याएर रास्वपाले जितेर गएका मानिसहरू खराब परेछन् भने सांसद बनेपछि पनि फिर्ता बोलाउने छौँ । हाम्रो त नजिर नै छ ७२ घण्टाभित्र फिर्ता गराएको । त्यसैका लागि हामीलाई धेरै मत चाहिएको हो । भोलि सांसदहरू फिर्ता गर्दा बहुमत नपुग्ला, घट्ला भनेर धेरैभन्दा धेरे मत चाहिएको छ ।’

यसअघि नागरिकता त्यागका कारण अनागरिक बन्दै उपप्रधान तथा गृहमन्त्री, प्रतिनिधिसभा सदस्य, रास्वपा सभापति पदबाट एक्कासी विमुख हुन पुगेका लामिछानेका कारण चितवनमा पुनः निर्वाचन गर्नुपरेको थियो । जसका कारण राज्ययलाई आर्थिक भार हुन पुगेको थियो ।

घण्टीबाट जितेका सांसद फेरि फिर्ता गर्ने लामिछानेको यो उद्घोषले त्यस ठाउँमा पुनः निर्वाचन गर्नुपर्ने हुँदा  सामाजिक सञ्जालमा आलोचना सुरु भएको छ ।