काठमाडौं : भारतीय प्रधानमन्त्री नरेन्द्र मोदीले नेपालको प्रतिनिधिसभा निर्वाचन सफल र शान्तिपूर्ण रूपमा सम्पन्न भएकोमा नेपाली जनता र सरकारलाई बधाई दिएका छन्।

सामाजिक सञ्जालमार्फत प्रतिक्रिया दिँदै मोदीले नेपाली दाजुभाइ-दिदीबहिनीले उत्साहका साथ आफ्नो लोकतान्त्रिक अधिकार प्रयोग गरेको देखेर खुसी लागेको उल्लेख गरेका छन्।

उनले यस निर्वाचनलाई नेपालको लोकतान्त्रिक यात्राको ऐतिहासिक उपलब्धि र गौरवको क्षणका रूपमा बताएका छन्।

भारत नेपालको नजिकको मित्र र छिमेकी भएको बताउँदै प्रधानमन्त्री मोदीले नेपालका जनता र नवनिर्वाचित सरकारसँग मिलेर साझा शान्ति, प्रगति र समृद्धिका नयाँ उचाइहरू हासिल गर्न भारत प्रतिबद्ध रहेको बताएका छन्।

चुनाव भएकै दिन नेपालस्थित अमेरिकी दूतावासले निर्वाचन सम्पन्न गरेकामा नेपाली जनतालाई बधाई दिँदै दुवै देशको समृद्धि र सुरक्षासम्बन्धी साझा लक्ष्यहरूमा सहकार्य गर्न उत्सुक रहेको जनाएको छ ।
‘निर्वाचन सम्पन्न भएकामा नेपाली जनतालाई हार्दिक बधाई ।

आगामी सरकारसँग हाम्रा दुवै देशको समृद्धि र सुरक्षासम्बन्धी साझा लक्ष्यहरूमा सहकार्य गर्न हामी उत्सुक छौं,’ नेपालस्थित अमेरिकी दूतावासको फेसबुक एकाउन्टमा लेखिएको छ ।