काठमाडौं । राष्ट्रिय स्वतन्त्र पार्टी (रास्वपा) ले नवनिर्वाचित सांसदहरूका लागि आयोजना गरेको अभिमुखीकरण कार्यक्रममा सहभागी हुने सांसदहरूलाई आचारसंहिता लगाएको छ  ।

पार्टीले आफ्ना सांसदहरूलाई तालिम अवधिभर मोबाइल फोन प्रयोग गर्न, आफन्त भेट्न र फोटो खिच्न समेत निषेध गरेको हो । ललितपुरको ग्वार्कोस्थित होटल रोयल टुलिपमा सोमबार र मंगलबार अर्थात् चैत ३ र ४ गते हुने अभिमुखीकरणका लागि पार्टीले यस्तो निर्देशन दिएको छ ।

रास्वपाका महामन्त्री कविन्द्र बुर्लाकोटीले जारी गरेको सूचनामा प्रत्यक्ष र समानुपातिक दुवै प्रणालीबाट निर्वाचित सांसदहरूलाई अनिवार्य उपस्थित हुन भनिएको छ । अभिमुखीकरण कार्यक्रमलाई पूर्ण रूपमा आवासीय बनाइएको छ ।

सूचनामा भनिएको छ, ‘कार्यक्रम आवासीय हुनेछ । पार्टीले सबै सांसदहरूको खाना र आवास सेयरिङ बेसिसमा सुनिश्चित गरेको छ ।’ कार्यक्रम हलभित्र मोबाइल फोन प्रयोग गर्न पूर्ण रूपमा रोक लगाइएको छ ।

पोशाकको विषयमा पनि पार्टीले नियम तोकेको छ । सांसदहरूले कार्यक्रममा बिजनेस क्याजुअल पोशाक लगाउनुपर्नेछ । सवारी साधन लिएर आउने सांसदहरूका लागि पार्किङको व्यवस्था भए पनि चालक र अन्य सहयोगीको व्यवस्थापन भने सांसद आफैँले गर्नुपर्ने नियम बनाइएको छ ।

होटलमा सांसदलाई छाडेपछि सवारी साधन परिसर वा बाहिर पार्क गर्न सकिने तर चालकको भोजन र आवासको व्यवस्थापन सांसदकै जिम्मेवारी हुने सूचनामा उल्लेख छ । यसका लागि होटल बाहिरको अन्य स्थानमा प्रबन्ध गर्न अनुरोध गरिएको छ ।