काठमाडौं । राष्ट्रिय जनमोर्चाका अध्यक्ष चित्रबहादुर केसीले विदेशमा रहेका नेपालीलाई सीआईएले कब्जा गरेर घण्टीमा भोट हाल्न लगाएको आरोप लगाएका छन्। अध्यक्ष केसीले पार्टीको पत्रकार सम्मेलनमा बोल्दै विदेशमा रहेका डाक्टर, इन्जिनियर, वकिल, न्यायाधीश, प्रोफेसर, विद्यार्थी सबैलाई सीआईएले कब्जा गरेको जिकिर गरे।

उनले भने, ‘उनीहरूलाई घरका आफ्ना आमा, बाबु, अभिभावकलाई घण्टीमा है भोट घण्टीमा, हैन भने म घर आउन्न। हेर्नुस् त, यस्तो देश हुँदा खेरी पनि हामी चिन्तित हुने कि नहुनेरु अब कति बुद्धि पुर्‍याएका हुन्रु नेपाली जनताले खान पाएनन्, नेपाली समाजमा भ्रष्टाचार भयो, नेपाली जनताले दुःख पाए भनेर हो र ? नेपाललाई चीनको विरुद्धमा लड्नको लागि उपयोग गरेको हो।’

उनले अमेरिकाले भनेर नै कांग्रेसी, एमाले र माओवादीले एमसीसी पास गरिदिएको आरोप लगाए।

उनले थपे, ‘एसपीपी पनि उनीहरूले पास खुरुक्क गर्दिएको भए त यो गति गराउँथेनन्। एसपीपी पास गर्न मानेनन्। यसमा सिधै कुरा छ। जनताको जनमत सधैँ सही ठाउँमा नपर्न सक्छ। इतिहासमा हिटलरको उदाहरण पनि छ। र ब्रिटिस साम्राज्यवादले दुई सय वर्ष भारतमा शासन गरेर अन्त्यमा हिन्दु-मुस्लिमबीच विभाजन सिर्जना गर्दै देश टुक्र्याएर गयो। आज पनि त्यसको असर देखिन्छ।’

अहिले विश्वभर मानव जातिको प्रमुख शत्रु अमेरिकी साम्राज्यवाद भएको जिकिर गरे।

उनले थपे, ‘हामीले यसको विरुद्ध बोल्दा केही शक्तिहरू असहज हुन्छन्। नेपालभित्रका राजनीतिक घटनाक्रममा समेत बाह्य हस्तक्षेप भएको आशंका गर्नुपर्ने अवस्था छ। इरानका जनताले साहस देखाएका छन्, तर हामीले नेपालमा साम्राज्यवादविरुद्ध जनमत निर्माण गर्न सकेनौँ भने हाम्रो स्थिति झन् जोखिमपूर्ण बन्न सक्छ। एकातिर भारतीय हस्तक्षेप र भूभाग मिचिने समस्या छ भने अर्कोतिर नागरिकताको विषयमा दबाब छ।’

अमेरिकाले नेपाल-चीन सम्बन्ध कमजोर बनाउन खोजिरहेको उनको विश्लेषण छ।

उनले भने, ‘पोखरा अन्तर्राष्ट्रिय विमानस्थलजस्ता परियोजनालाई ऋणको पासो भनेर प्रस्तुत गरिन्छ। एमसीसीजस्ता सम्झौतामार्फत नेपाललाई रणनीतिक रूपमा प्रयोग गर्ने प्रयास भइरहेको छ। यदि हामी सचेत भएनौँ भने नेपाललाई ठुलो शक्ति सङ्घर्षको मैदान बनाइने खतरा छ।’