काठमाडौं : प्रतिनिधिसभाका नवनिर्वाचित सांसदहरूले सपथ लिएका छन्। सिंहदरवारस्थित संसदमा उनीहरूले सपथ लिएका हुन्।

संसदका ज्येष्ठ सदस्य अर्जुननरसिंह केसीले सांसदहरूलाई सपथ गराएका हुन्। सपथ समारोहमा राष्ट्रिय स्वतन्त्र पार्टीका सभापति रवि लामिछाने पनि सहभागी थिए। उनको मुद्दा अदालतमा चलिरहेका बेला सपथ लिन पाउने कि नपाउने बहस चलिरहेका बेला सभापति लामिछानेले पनि सांसदको सपथ लिएका हुन्।

सपथ समारोहअघि संसद सचिवालयका महासचिव पद्मप्रसाद पाण्डेयले संसदका काम कारबाही हाललाई बहुउद्देश्यीय हलबाट सञ्चालन गरिने बताए। उनले संसद हलमा कमी कमजोरीसमेत रहेको हुनसक्ने बताउँदै हाललाई सोही हलबाट काम चलाउने स्पष्ट पारे।

४७ सांसदले लिए मातृभाषामा संसदको शपथ

संघीय संसद् सचिवालयका अनुसार ४७ जनाले नेपाली बाहेक आ–आफ्नो मातृ भाषामा शपथ लिएका छन् । नेपालको संविधानको धारा ९९ र ९१ को उपधारा ५ तथा प्रतिनिधिसभा सदस्य निर्वाचन ऐन, २०७४ को दफा ७५ बमोजिम पद तथा गोपनीयताको शपथ लिने व्यवस्था छ ।

गत फागुन २१ गते सम्पन्न प्रतिनिधिसभा सदस्यको निर्वाचनमा राष्ट्रिय स्वतन्त्र पार्टीले १८२, नेपाली कांग्रेसले ३८, नेकपा (एमाले) ले २५, नेपाली कम्युनिष्ट पार्टी (नेकपा) ले १७, श्रम संस्कृति पार्टीेले सात र राष्ट्रिय प्रजातन्त्र पार्टीले पाँच सिट प्राप्त गरेका छन् ।

नौलो दृष्य : ज्ञानेन्द्र–हर्क र प्रचण्ड–बादल सँगसँगै, एउटै बेञ्चमा कांग्रेस–एमाले र नेकपा

रास्वपा वाहुल्य रहेको रहेको प्रतिनिधिसभाको शपथ ग्रहणमा आज रोचक र नौलो दृष्य देखिएको छ । सभाहलको आधाभन्दा ठूलो भाग ओगटिने गरी रास्वपाका सांसदहरु कक्षको दुई वटा ‘रो’ मा बसेका थिए । परम्परागत ठूला दलहरु कांग्रेस, एमाले र नेकपा एउटै ‘रो’ मा देखिएका थिए ।

प्रतिपक्षी लहरको सबैभन्दा अघिल्लो सिटमा नेकपा संयोजक पुष्पकमल दाहाल (प्रचण्ड) र नेकपा एमाले उपाध्यक्ष रामबहादुर थापा ‘बादल सँगसँगै देखिए । उनीहरु पूर्व सहयोद्धा हुन्। उनीहरु दुवै राष्ट्रिय पोशाकमा थिए । उनीहरुसँगै कांग्रेसका दुई सांसद छन् । तेस्रो ‘रो’ मा राप्रपाका ज्ञानेन्द्र शाही र श्रम संस्कृति पार्टीका हर्क साम्पाङ पहिलो सिटमा सँगसँगै देखिएका थिए । आजको बैठकमा प्रायः सांसदहरुले राष्ट्रिय पोशाक लगाएका थिए । केही सांसदले मौलिकता झल्किने गरी जातीय र सांस्कृतिक पहिरन लगाएर पुगेका थिए ।