बुधबारको प्रतिनिधिसभाको बैठकमा पूर्वप्रधानमन्त्री केपी शर्मा ओली पक्राउको विषयलाई लिएर राष्ट्रिय स्वतन्त्र पार्टी (रास्वपा)का सांसद र नेकपा एमालेका सांसदहरूबीच घोचपेच चल्यो । एमालेले पहिलोपटक नियमापत्ति जनाउँदै रास्वपाका सांसदले बोलेको कुरा रेकर्डबाट हटाउन सभामुख डोलप्रसाद (डीपी) अर्यालको ध्यानाकर्षण गरायो ।

अघिल्ला बैठकमा झैँ एमालेका सांसहरू ओलीको पक्राउको विरोधमा उत्रिए । सदनमार्फत सरकारलाई ओली र पूर्वगृहमन्त्री रमेश लेखकलाई बिनासर्त रिहा गर्न माग गरे ।

रास्वपाका सांसदहरू भने जेन-जी आन्दोलनमा दमन गर्ने दोषीलाई कारबाही गर्नुपर्ने बताए । रास्वपाका सांसद प्रहरी हिरासतमा रहेका पूर्वप्रधानमन्त्री तथा एमाले अध्यक्ष ओलीलाई ‘अपराधी’को संज्ञा दिन पछि परेनन् ।

बैठकमा रास्वपाका सांसद पुरुषोत्तम सुप्रभात यादवले पूर्वप्रधानमन्त्री तथा एमाले अध्यक्ष ओलीलाई ‘अपराधी’को संज्ञा दिए । अस्पतालको बेडमा रहेका ओलीले संसदमा कुविचार प्रवाह गरिरहेको पनि सांसद यादवले आरोप लगाए ।

सांसद यादवले भने ओली अस्पतालमा नभई कारागारमा हुनुपर्ने दाबी गरे । ‘जुन भूतले कमरेड ओलीलाई छलेको थियो, त्यही भूतले आज कमरेड बादललाई छलेको देखिन्छ । त्यसैले म सरकारसँग जोडदार माग गर्दछु– एउटा भूत झार्ने झाँक्रीको व्यवस्था गरियोस्,’ यादवले भने, ‘किनकि, आज जुन अपराधी कारागारको ढोकाभित्र हुनुपर्ने थियो, त्यो हस्पिटलको बेडमा छ । त्यही बेडबाट कुविचार यो सम्मानित सदनसम्म पठाउँदै छ ।’

सांसद यादवले २३ र २४ भदौमा भएको जेन-जी आन्दोलन न्याय, समानता र अधिकारका लागि भएको बताए । ‘म आज यो सम्मानित सदनमा स्पष्ट रूपमा भन्न चाहन्छु– जेन-जी आन्दोलन किन भएको थियो, यो आन्दोलनको माग न्याय, समानता र अधिकारका लागि भएको कसैले पनि कहिल्यै बिर्सिनु हुँदैन । यो सरकार त्यही रक्तरंजित आन्दोलनको बलिदानमाथि बनेको हो,’ उनले भने, ‘कहिले जेन-जी घाइतेहरूको रोजगारी सुनिश्चित हुन्छ ? र, कहिले मृतक परिवारले न्याय पाउँछन् ?’

यादव जेन-जी आन्दोलनका क्रममा अभियन्ता थिए । उनले काठमाडौं जिल्ला प्रशासनबाट शान्तिपूर्ण आन्दोलनका गर्ने भनी अनुमति लिएका थिए । जेन-जी आन्दोलनबाट उदाएका उनी रास्वपाबाट सांसद बने ।

एमालेकी सांसद साजिदा खातुन सिद्धिकीले प्रतिवाद गरिन् । ‘एक माननीयले मेरो पार्टीका अध्यक्ष पूर्वप्रधानमन्त्री सम्माननीय नेता केपी शर्मा ओलीलाई गरेको तुच्छ व्यवहारप्रति घोर आपत्ति व्यक्त गर्दछु । यो अभिव्यक्ति अभिलेखबाट हटाइयोस्,’ उनले भनिन् ।

विशेष समय सकिएपछि कार्यतालिकामा प्रवेश गर्नुअघि रास्वपा सांसद यादवको भनाइमा एमाले सांसद गुरु बरालले नियमापत्ति जनाए । बरालले प्रतिनिधिसभाको नियमावलीअनुरुपको अशिष्ट व्यवहार बोलीचालीको सन्दर्भमा रहेकाले हटाउन माग गरे । ‘हाम्रो पार्टीको अध्यक्ष पूर्वप्रधानमन्त्रीलाई अत्यन्त आपत्तिजनक अपराधीको संज्ञा सत्तापक्षका सांसदले दर्ज गर्नुभयो । अपराधी करार गर्ने यो संसद होइन, अपराधी न्यायालयले करार गर्छ,’ उनले भने, ‘धामी झाँक्रीको माग गर्नुभएको छ । प्रतिनिधिसभा अन्धविश्वासलाई विश्वास गर्ने ठाउँ होइन ।’

उनले एमाले संसदीय दलका नेता रामबहादुर थापा ‘बादल’लाई पनि अपमान गरेकाले त्यस्ता शब्द रेकर्डबाट हटाउन माग गरे । एमाले सांसदको नियमापत्तिपछि आफ्नो ध्यानाकर्षण भएको सभामुख डोलप्रसाद अर्यालले जानकारी गराए ।

एमाले सांसद निता घतानीले ओलीमाथि लगाइएको मुद्दा तत्काल फिर्ता गर्न माग गरिन् । ‘हाम्रो पार्टीका अध्यक्ष तथा पूर्वप्रधानमन्त्री केपी शर्मा ओलीमाथि लगाइएको मुद्दा तत्काल फिर्ता गर्न जोडदार माग गर्दछु । राजनीतिक प्रतिशोधका आधार लगाएर यस्ता मुद्दाहरूले राजनीतिक मर्यादा र संविधानको मर्मलाई गम्भीर रूपमा कमजोर बनाउँछन् । संविधानको अधिकार र कानुनी संरक्षणलाई मध्यनजर राखेर मुद्दा तत्काल फिर्ता गरियोस्,’ सांसद घतानीले भनिन् ।

एमालेका अर्का सांसद टुकाभद्रा हमालले पनि ओली तथा पूर्वगृहमन्त्री तथा नेपाली कांग्रेसका नेता रमेश लेखकलाई नि:सर्त रिहाइको माग गरिन् । ‘पूर्वप्रधानमन्त्री तथा एमाले अध्यक्ष केपी शर्मा ओली र पूर्वगृहमन्त्री तथा नेपाली कांग्रेसका नेता रमेश लेखकलाई गैरकानुनी ढंगले थुनामा राखिएको छ । उहाँहरू दुवैलाई बिनासर्त रिहाइ गर्न माग राख्दछु,’ उनले बैठकमा भनिन् ।

जेन-जी आन्दोलनका क्रममा प्रधानमन्त्री रहेका ओली र गृहमन्त्रीको पदमा रहेका लेखकलाई १४ भदौमा पक्राउ गरिएको थियो । ओली र लेखकलाई गत २३ र २४ भदौको घटनाको छानबिन गर्न गठित गौरीबहादुर कार्की नेतृत्वको आयोगको प्रतिवेदनले दोषी देखाएका आधारमा प्रकाउ गरिएको हो । हेलचेक्र्याइँपूर्वक ज्यान मारेको अभियोग उनीहरूमाथि छ । ओली र लेखकलाई बिहीबारसम्म हिरासतमुक्त गर्न सर्वोच्च अदालतले आदेश दिएको छ ।