काठमाडौँ– नेपाली कांग्रेस निकट नेपाल विद्यार्थी संघ (नेविसंघ)ले मनोहरा सुकुम्बासी बस्ती भत्काउँदा २७५ अध्ययरत विद्यालय पनि भत्काएपछि आपत्ति जनाएको छ।

आइतबार सुकुम्बासी बस्ती भत्काउँदा २१ वर्षदेखि सञ्चालनमा रहेको सरस्वती आधारभूत विद्यालय भत्काइएको थियो। उक्त विद्यालय भत्काइएकोमा नेविसंघका प्रवक्ता सुरज सेजुवालले सोमबार विज्ञप्ति जारी गर्दै आपत्ति प्रकट जनाएका छन्।

‘विशेषतः आगामी २० गतेदेखि नयाँ शैक्षिक सत्र सुरु हुने तयारी भइरहेका बेला २७५ जना विद्यार्थी अध्ययनरत रहेको विद्यालय वैकल्पिक योजना विनै भत्काउनु अत्यन्त संवेदनशील एवं आपत्तिजनक विषय हो’, विज्ञप्तिमा भनिएको छ।

विद्यालय केवल भौतिक संरचना मात्र नभई बालबालिकाको सिकाइ, संरक्षण र भविष्य निर्माणको आधार भएको भन्दै बालबालिकाको शिक्षालाई कुनै पनि अवस्थामा अवरुद्ध हुन नदिने गरी संवेदनशील र जिम्मेवार व्यवस्थापन आवश्यक रहेको विज्ञप्तिमा जनाइएको छ।