काठमाडौं । राष्ट्रपति रामचन्द्र पौडेलले सहकारीसम्बन्धी अध्यादेश जारी गरेका छन् ।

मंगलबार २ र बुधबार ४ अध्यादेश सिफारिस हुन आएकोमा पहिलो चरणमा बिहीबार उनले ‘सहकारी (पहिलो संशोधन) अध्यादेश, २०८३’ जारी गरेका राष्ट्रपतिको कार्यालयले जनाएको छ ।

नेपालको संविधानको धारा ११४ को उपधारा १ बमोजिम सरकारको सिफारिसमा उनले अध्यादेश जारी गरेका हुन् । गएको सोमबार (वैशाख १४) बसेको मन्त्रिपरिषद्को बैठकबाट यो अध्यादेश जारी गर्न राष्ट्रपतिसमक्ष सिफारिस गर्ने निर्णय गरिएको थियो । मंगलबार (वैशाख १५) राष्ट्रपतिको कार्यालयमा २ अध्यादेश पुर्‍याइएको थियो ।

बुधबार ३ अध्यादेश र बुधबार राति नै राष्ट्रपति कार्यालय पुर्‍याइएको अध्यादेशसँगै सरकारले तयारी गरेको अध्यादेशको सङ्ख्या ७ पुगेको छ । राष्ट्रपति कार्यालय पुर्‍याएको पछिल्लो अध्यादेश स्वास्थ्य विज्ञान प्रतिष्ठानलाई सञ्चालन तथा नियुक्तिसम्बन्धी रहेको थियो ।

यसअघि राष्ट्रपति कार्यालय पुगेका ६ अध्यादेशमा सहकारी ऐन संशोधन अध्यादेशसँगै संवैधानिक परिषद्सम्बन्धी अध्यादेश, , विश्वविद्यालयसम्बन्धी अध्यादेश, केही नेपाल ऐन संशोधन अध्यादेश, सार्वजनिक पदाधिकारी पदमुक्ति अध्यादेश र सार्वजनिक खरिद ऐन संशोधन अध्यादेश छन् ।

संसदको अधिवेशन रोकेर संसदको बाटो छली सरकारले ल्याउन लागेका अध्यादेशप्रति विपक्षी दलहरूले विरोध गरेका छन् भने राष्ट्रपतिलाई कुनै हालतमा ती अध्यादेश जारी नगर्न आग्रह गरिसकेका छन् ।

यता सत्तारुढ दल राष्ट्रिय स्वतन्त्र पार्टी(रास्वपा) कै कतिपय सांसदहरूले समेत दुईतिहाइ नजिकको सरकारले अध्यादेश ल्याउने काम कुनै बहादुरी नभएको टिप्पणी गरेका छन् ।