काठमाडौं । नेपाली कांग्रेसका सभापति गगन थापाले सरकारले अध्यादेशमार्फत् शासन गर्न खोजेर संसद् र नागरिकलाई हेपेको बताएका छन् ।

सर्लाही पुगेका थापाले पत्रकारसँगको कुराकानीमा यस्तो बताएका हुन् ।

उनले अहिले संसद् अधिवेशन बोलाएर पनि स्थगित गर्नुको कारण पुष्टि भएको बताउँदै उनले भने, “यो संसद् र नागरिकलाई हेपेको हो ।”

सभापति थापाले संसद्प्रति विश्वास छैन भन्ने मानेर सरकारले संसद् छलेर अध्यादेश ल्याएको बताउँदै भने,“नागरिकलाई किन हेपेको हो भने केही भन्नै नपर्ने । केही मन्त्रीले संसद्को तयारी नभएको हुँदा अनुरोधमा स्थगित भएको बताउनुभयो । पहिला उहाँहरुले ढाँट्नुभयो । अहिले हेप्नुभयो ।”

उनले संवैधानिक परिषदमा सुधारको आवश्यकता भए पनि विधि र प्रक्रियाअनुसार हुनुपर्ने बताए ।

“हामी मधुरो स्वरमा बोलौँ भनेका छौँ, सरकारका सुधारका बारेमा हामीले विरोध गर्न चाहन्नौँ तर म एक्लै चलाउँछु, बाँकीलाई पेलपाल गर्छु भन्ने हो भने उहाँहरुलाई पनि यसले अप्ठेरोमा पार्छ,” थापाले भने ।