काठमाडौं । पूर्वमन्त्री सुदन किरातीले प्रधानमन्त्री बालेन्द्र शाहमा अधिनायकवादी प्रवृत्ति देखिएको आरोप लगाएका छन् ।

सुकुमबासी बस्ती हटाउने क्रममा राज्यले अमानवीय व्यवहार गरेको आरोप लगाउँदै उनले बालेनमा अधिनायकवादी प्रवृत्ति देखिएको टिप्पणी गरेका हुन् । ‘पुराना पार्टीहरूले जनताको विश्वास गुमाएको अवस्थामा उनमा हिटलर र मुसुलोनी बन्ने सपना जागेको छ’सुदनको टिप्पणी छ ।

विगतमा परिवर्तनको आशा बोकेका जनताले विश्वास गरेको नेतृत्वबाट अहिले उल्टो व्यवहार भइरहेको बताउँदै उनले गरिब र कमजोर वर्गमाथि डोजर चलाइएको घटनालाई ‘राज्यसत्ताको दुरुपयोग’को संज्ञा दिएका छन्।

उनले सुकुमबासी समस्यामा ‘होलसेल’ दृष्टिकोण अपनाइएको भन्दै वास्तविक पीडितहरू अन्यायमा परेको उल्लेख गरे । ‘सुकुमबासीको नाममा हुकुमबासीलाई सजाय गर्नैपर्छ, तर निर्दोष र कमजोर वर्गमाथि अमानवीय व्यवहार भइरहेको छ,’ उनले लेखेका छन् ।

किरातीले सामाजिक सञ्जालमार्फत जनमतलाई प्रभावित पार्ने प्रयास भइरहेको आरोप पनि लगाएका छन् । उनका अनुसार यसले ‘जनता विरोधी भाष्य निर्माण’ गरिरहेको छ र देशलाई ‘ओलिगार्ची स्टेट’ तर्फ धकेलिरहेको छ।

संवैधानिक रूपमा सुनिश्चित गास, बास र नागरिकको आत्मसम्मानको अधिकारमाथि प्रहार भइरहेको भन्दै उनले अन्तर्राष्ट्रिय मानवअधिकारका मापदण्डसमेत उल्लंघन भएको दाबी गरेका छन् ।

यस्तो बेला अग्रगामी दृष्टिकोणसहित नागरिकको आवाजलाई पुनःजागृत र सशक्त बनाउँदै, नागरिकको जनजीविका र आत्मसम्मानको मुद्दालाई अझ स्पष्ट र प्रभावकारी रूपमा अघि बढाउन साझा अभियानको आवश्यकता टड्कारो बनेको सुदनको भनाइ छ । उनले जनता र देशको पक्षमा चिन्ता गर्ने सबै सचेत नागरिकलाई यस अभियानबारे गम्भिरतापूर्वक सोच्न, एकताबद्ध हुन र अघि बढ्न अपिल समेत गरेका छन् ।