काठमाडौँ — श्रम संस्कृति पार्टीका अध्यक्ष  हर्क साम्पाङले प्रधानमन्त्री बालेन्द्र शाहले संसदको मर्यादा र संसदीय अभ्यासको बेवास्ता गरेको आरोप लगाउँदै नैतिकताको आधारमा पदबाट राजीनामा दिनुपर्ने बताएका छन् ।

उनले शुक्रबार जारी वक्तव्यमा प्रधानमन्त्री शाहले नीति तथा कार्यक्रम प्रस्तुतिका क्रममा संसदप्रति गैरजिम्मेवार व्यवहार देखाएको दाबी गरेका हुन् ।

उनले राष्ट्रपति रामचन्द्र पौडेलले सरकारको नीति तथा कार्यक्रम पढिरहेका बेला प्रधानमन्त्री संसदबाट बाहिरिएको, त्यसपछि सभामा नफर्किएको तथा नीति तथा कार्यक्रममाथिको छलफलका क्रममा समेत अनुपस्थित रहेको, प्रतिपक्षले उपस्थितिको माग गर्दा पनि संसद्‍मा नआएको र आफ्नै कार्यालयबाट संसदका गतिविधि लाइभ हेरेर बसेको उल्लेख गरेका छन्।

‘जनताको सार्वभौम सदनलाई अपमान गरेर त्यही संसदबाट चुनिएको प्रधानमन्त्रीले कुन नैतिकताको आधारमा आफूलाई प्रधानमन्त्री ठानिरहेको छ ?’ वक्तव्यमा राईले प्रश्न गरेका छन् । उनले प्रधानमन्त्रीले संसदमा उठेका प्रश्नको जवाफ दिनुपर्ने संसदीय परम्पराको समेत बेवास्ता गरेको उल्लेख गर्दै राजीनामा दिएर मार्ग प्रशस्त गर्दा लोकतन्त्र सम्मानित हुने बताएका छन्।

‘कर्तव्य पूरा नगर्दा अधिकार प्राप्त नहुने हुँदा न्यूनतम कर्तव्य समेत पूरा नगरेको कारण नैतिकताको आधारमा पदबाट राजीनामा दिएर मार्ग प्रशस्त गर्दा लोकतन्त्र सम्मानित हुने, जनता सम्मानित हुने देखिन्छ,’ राईको भनाइ छ ।

राईले सरकारले संसदलाई छल्दै अध्यादेशमार्फत शासन चलाउन खोजेको आरोप समेत लगाएका छन् । उनले सीमाको रक्षा गर्न नसकेको, गरिब तथा दुःखी जनतालाई राहत दिन नसकेको भन्दै सरकारको आलोचना गरेका छन् ।