अर्थमन्त्री डा. स्वर्णिम वाग्लेले आगामी आर्थिक वर्ष २०८३/८४ का लागि २१ खर्ब २४ अर्ब ३४ करोड रुपैयाँ बराबरको बजेट सार्वजनिक गरेका छन्।

सङ्घीय संसद्को संयुक्त बैठकमा शुक्रबार बजेट वक्तव्य प्रस्तुत गर्दै उनले उत्पादन वृद्धि, रोजगारी सिर्जना र प्रशासनिक सुधारलाई प्राथमिकतामा राखेर खर्चको अनुमानित विवरण पेश गरेका हुन्।

विनियोजित बजेटमध्ये सरकारले चालु खर्चतर्फ १२ खर्ब ७० अर्ब रुपैयाँ र पूँजीगत (विकास) खर्चतर्फ ४ खर्ब ३१ अर्ब रुपैयाँ छुट्याएको छ।

त्यसैगरी, वित्तीय व्यवस्थातर्फ ४ खर्ब २२ अर्ब रुपैयाँ विनियोजन गरिएको अर्थमन्त्री वाग्लेले जानकारी दिए।

बजेटको खर्च धान्ने स्रोततर्फ सरकारले राजस्वबाट १४ खर्ब ४ अर्ब रुपैयाँ सङ्कलन गर्ने लक्ष्य लिएको छ। वैदेशिक अनुदानबाट ६१ अर्ब ७४ करोड रुपैयाँ र वैदेशिक ऋणबाट २ खर्ब ४७ अर्ब रुपैयाँ जुटाइने बजेटमा उल्लेख छ।

राजस्व र वैदेशिक सहायताले नपुग्ने बाँकी न्यून हुन आउने ४ खर्ब १० अर्ब रुपैयाँ भने आन्तरिक ऋणबाट व्यवस्थापन गरिने अर्थमन्त्रीले बताए।