एकै मन्त्रीलाई ५ सल्लाहकारसहित १४ जनासम्मको सचिवालय सुविधा दिने निर्णय सरकारले गरेको छ । अघिल्ला सरकार भन्दा बढी स्वकीयको सुविधा थपेको हो । शुशिला कार्कीले गरेको निर्णय बालेन सरकाले उल्टाउन पुगेको छ । यद्यपी, प्रतिनिधिसभा सदस्य, राष्ट्रिय सभा सदस्यहरु, प्रदेशका सांसदहरु, प्रदेश प्रमुख, प्रदेशका मन्त्रीहरुबारे भने निर्णय गरिसकेको छैन ।

सरकारले मन्त्रालयका कामहरू छिटोछरितो गर्ने भन्दै ५७ जना सल्लाहकारहरू नियुक्त गर्ने निर्णय गरेको बताइन्छ । नेपाल सरकारका सचिवस्तरको सेवा सुविधा पाउनेगरी सल्लाहकारहरू नियुक्त गर्न प्रधानमन्त्री तथा मन्त्रिपरिषद्को कार्यालयले मन्त्रालयहरूलाई शुक्रबार पत्राचार गरिसकेको छ ।

मन्त्रीहरूको सल्लाहकार र सचिवालय व्यवस्थापनसम्बन्धी कार्यविधि २०८३ लाई स्वीकृत गरी पहिलोपटक विशिष्ट श्रेणीस्तरका सल्लाहकारहरू रहने व्यवस्था सरकारले गर्न लागेको प्रधानमन्त्री तथा मन्त्रिपरिषद्को कार्यालय स्रोतले बताएको छ ।

शुक्रबार मन्त्रालयहरूलाई पठाइएको कार्यविधिअनुसार मन्त्रीको सचिवालयमा सल्लाहकारसहितका पदाधिकारीहरू नियुक्त हुनेछन् । जसअनुसार ऊर्जा जलस्रोत तथा सिँचाइ, पूर्वाधार विकास र कृषि वन तथा पर्यावरण मन्त्रालयमा पाँच–पाँच जना सचिवस्तरका सल्लाहकार नियुक्त गरिनेछ ।

अरु १४ वटा मन्त्रालयमा पनि विशिष्ट श्रेणीका सल्लाहकारहरू नियुक्त हुने व्यवस्था सो कार्यविधिले गरेको छ । जसअनुसार मन्त्रालयहरूमा एक जना वैतनिक र दुई जना अवैतनिक सल्लाहकारहरू नियुक्त हुनेछन् ।

मन्त्रीको सचिवालय पनि ठूलो बनाउन लागिएको छ । कार्यविधिअनुसार मन्त्रीको सचिवालयमा सल्लाहकारबाहेक ९ जना नियुक्त हुनेछन् । स्वकीय सचिवालयतर्फ मन्त्रीले उपसचिवस्तरका एक जना नियुक्त गर्न पाउँछन् । शाखा अधिकृतस्तरका दुई जना, नायव सुब्बास्तरका दुई जना, कार्यालय सहयोगी दुई जना र चालक दुई जना नियुक्त गर्न पाउने व्यवस्था कार्यविधिले गरेको छ ।

उपप्रधानमन्त्रीको सचिवालयमा सह–सचिवस्तरका कर्मचारी एक जना थप नियुक्त गर्न पाइने व्यवस्था कार्यविधिमार्फत गरिएको छ । यद्यपि, अहिले उपप्रधानमन्त्री नियुक्त गरिएको छैन ।

प्रधानमन्त्रीको सल्लाहकार र सचिवालय व्यवस्थापनसम्बन्धी कार्यविधि छुटै रहेको छ । सोही कार्यविधिअनुसार प्रधानमन्त्री वालेन्द्र शाहको सचिवालयमा सल्लाहकार, विज्ञ र सदस्यहरू नियुक्त भएर काम गरिरहेका छन् । शुशिला कार्कीले ६ जनामा झारेको सचिवालयमा बालेनले डेढ दर्जन बनाइसकेका छन् ।