संस्कृति, पर्यटन तथा नागरिक उड्डयनमन्त्री खडकराज पौडेल (गनेस) ले पोखराका तीर्थ श्रेष्ठलाई पशुपति क्षेत्र विकास कोषको सदस्य सचिव नियुक्त गरेका छन् ।

कोषको अध्यक्षसमेत रहेका मन्त्री पौडेलले बुधबार मन्त्रीस्तरीय निर्णयमार्फत श्रेष्ठलाई उक्त पदमा मनोनित गरेका हुन् । नियुक्तिपत्र बिहीबार श्रेष्ठले मन्त्री पौडेलबाट बुझे ।

पोखराको प्रसिद्ध विन्ध्यवासिनी धार्मिक क्षेत्र विकास समितिमा २५ वर्षदेखि सचिव र वरिष्ठ उपाध्यक्षका रूपमा सफल व्यवस्थापकीय भूमिका निर्वाह गरिसकेका श्रेष्ठलाई पशुपतिको भद्रगोल व्यवस्थापन सुधार्ने मुख्य जिम्मेवारी मन्त्री पौडेलले दिएका हुन् । श्रेष्ठ नेपाल संगीत तथा नाट्य प्रज्ञा–प्रतिष्ठानका संस्थापक सदस्य सचिवका साथै पोखराका पूर्वउपमेयरसमेत हुन् । श्रेष्ठको नियुक्तिसँगै पशुपति क्षेत्र विकास कोषको प्रशासनिक नेतृत्वले पूर्णता पाएको छ । कोषले पशुपतिनाथ मन्दिर परिसरको व्यवस्थापन, सम्पदा संरक्षण तथा धार्मिक गतिविधिको समन्वय गर्दै आएको छ ।

२०१६ साल कात्तिक १६ गते पोखराको सिंहनाथ टोलमा जन्मिएका श्रेष्ठ नेपाली साहित्य र संस्कृतिको क्षेत्रमा स्थापित नाम हो । २०३६ सालको ऐतिहासिक सडक कविता क्रान्तिबाट उदाएका श्रेष्ठले नेपाली लेखक संघको केन्द्रीय अध्यक्ष तथा पोखरेली युवा सांस्कृतिक परिवारको तीन पटकसम्म अध्यक्ष भएर काम गरिसकेका छन् । उनको ‘आमा’, ‘जिन्दगीको कुरुक्षेत्रबाट’ र ‘महाभारतका गीतहरू’ लगायत काव्यकृतिहरू चर्चित छन् ।