काठमाडौँ । नेकपा (एमाले) का अध्यक्ष केपी ओलीले रास्वपाका वरिष्ठ नेता बालेन शाह नेतृत्वको सरकार आफै ढल्ने दाबी गरेका छन् ।
पार्टी मुख्यालय च्यासलमा आयोजित कार्यक्रममा बोल्दै सरकार ढाल्ने तत्त्वहरूले त्यहीँभित्र रहेको बताए ।

उनले भने, ‘अहिलेको सरकार कसैले नढालेपछि ढाल्ने तत्त्वहरू त्यहाँ पुगेका हुन्छन्, ढल्छ, जान्छ । यो चटकको भरमा आएको, चटककै भरमा जान्छ । तर त्यो पर्खिएर बस्यौँ भने त्यसले देश बर्बाद पारिसकेको हुन्छ । लोकतन्त्र बर्बाद गरिसक्छ। त्यसैले परिवर्तन पर्खिने चिज होइन ।’

पार्टीभित्र र बाहिरबाट उठ्ने आलोचनाप्रति प्रतिक्रिया दिँदै ओलीले आफू ५७ वर्षदेखि जेल, संघर्ष र राजनीतिक यात्रामार्फत पार्टी निर्माणमा निरन्तर लागेको उल्लेख गरे। पार्टीको नेतृत्वमा रहेकाले सफलता र असफलता दुवैको जिम्मेवारी आफूले लिने स्पष्ट पार्दै उनले पार्टी सफल हुँदा सबैले श्रेय लिने तर चुनौती वा विरोध बढ्दा सबै दोष अध्यक्षमाथि मात्र थोपर्ने प्रवृत्ति उचित नभएको बताए।

अध्यक्ष ओलीले लोकतन्त्रविरोधी र देशविरोधी गतिविधि बढाउन खोजिएको आरोप लगाउँदै समाजमा फैलाइएका भ्रम र अन्योल चिर्न पार्टीका नेता तथा कार्यकर्तालाई सक्रिय रूपमा जनतामाझ जान निर्देशन दिए।