काठमाडौँ । कीर्तिपुरमा कारभित्र जलेको अवस्थामा फेला परेका सुरेशचन्द्र श्रेष्ठले आत्मदाह गरेको प्रहरीले अनुसन्धानबाट निष्कर्ष निकालेको छ ।

काठमाडौँ महानगरपालिका वडा नम्बर–२६ नरदेवी घर भएका श्रेष्ठ परिवारसँग कीर्तिपुरस्थित ग्रिन उड भिल्लामा बस्दै आएका थिए ।

मंगलबार बिहान ११ बजेर २० मिनेटमा श्रेष्ठ आफैँले चलाएर बा.५ च ३०३८ नम्बरको कार लिएर ट्याङ्गलाफाँटस्थित चाँदनी चोकमा पुगेका थिए । सडकबाट केही पर खाली जग्गामा गाडी पार्किङ गरेपछि कारभित्रैबाट आगो सल्किएको प्रत्यक्षदर्शीहरुले देखेका थिए । घटनास्थल नजिकै रहेका एक जना युवकले आगो लागेको देखेपछि दौडिँदै गएर कारको अगाडि पट्टिको ढोका खोलेको सिसिटिभी फुटेजमा देखिएको छ । चालक सिटसँगैको ढोका खोल्दा उनको समेत हातमा पोलेपछि उनी फर्किएको फुटेजमा देखिएको अनुसन्धानमा संलग्न अधिकृतहरू बताउँछन् ।

घटनास्थलमा पुगेका प्रहरीले आगो निभाउने प्रविधिको प्रयोग गरेर आगलागी नियन्त्रणमा लिँदा श्रेष्ठ चालक सिटमा मृत अवस्थामा भेटिएका थिए । ७० वर्षीय श्रेष्ठ औषधी व्यवसायी हुन् ।

उनले चलाएको कार २०६२ कार्तिक २७ मा नबिल बैंकबाट ऋण लिएर खरिद गरेको भेटिएको छ । यातायात व्यवस्था विभागको रेकर्ड अनुसार कार सुरेशचन्द्र र रजनी श्रेष्ठको रहेको भेटिएको छ ।

कोरोना संक्रमण शुरु भएपछि औषधीको व्यापारमा घाटा भएसँगै उनी ऋणमा डुबेका थिए । आर्थिक रूपमा कमजोर भएपछि उनी तनावमा रहेको बताइन्छ । पछिल्लो समय सुरेशचन्द्र आर्थिक रूपमा कमजोर भएको र तनावको कारण उनले कारभित्रै आगो सल्काएर आत्मदाह गरेको हुनसक्ने प्रारम्भिक अनुसन्धानबाट थाहा भएको काठमाडौँ प्रहरी बताउँछ ।