नेपाली कम्युनिष्ट पार्टीका संयोजक तथा पूर्व प्रधानमन्त्री पुष्पकमल दाहाल प्रचण्डले आफ्नो पार्टी सरकारमा जान लालायित नरहेको स्पष्ट पार्दै कांग्रेस एमालेलाई मिलेर जान सुझाव दिएका छन् ।

नेकपा र एमालेबीच प्रदेशमा नयाँ समीकरण बन्न लागेको चर्चा चलिरहेका बेला आज उनको यो प्रतिक्रिया आएको हो । प्रचण्डले गठवन्धन नटुटाउन कांग्रेस र एमालेलाई आग्रहसमेत गरे ।

पुष्पलाल स्मृति दिवसको सन्दर्भमा काठमाडौंमा आयोजित विचार गोष्ठीमा बोल्दै उनले प्रदेशहरूमा दुई पार्टीको रडाको मच्चिएका कारण नेकपामाथि बाध्यता आइलागेको बताएका छन्

‘अहिले हामीलाई एउटा झमेला आइलागेको छ । प्रदेश सरकारको झमेला । हामीले शुरुदेखि नै काँग्रेस र एमालेको सरकार सबै प्रदेशमा छ, तपाईहरु चलाइराख्नुस् हामीलाई चाहिएन भन्दाभन्दै यो बजेटको बेलामा काँग्रेस र एमालेको बीचमा यस्तो रडाको पर्यो कि बजेट पास गर्नै नसक्ने स्थिति आएपछि हामीमाथि बाध्यता आयो’, उनले भने, ‘हामीले पनि फेरी प्रदेश बरबादै हुन त दिनु हुँदैन भनेर ध्यान दिनुपर्ने अवस्था आइलाग्यो । म फेरी पनि भन्न चाहान्छु, हामीलाई अहिले सरकार चाहिएको छैन । नेपाली कम्युनिष्ट पार्टीको प्राथमिकता सरकार हुँदै होइन । राष्ट्रिय स्वाधिनता र जनताको हक अधिकारको निम्ति आन्दोलन आजको आवश्यकता हो । हामीलाई सरकार चाहिएको छैन ।

विगतमा अन्य दलसँग सहकार्य गर्दै वर्षौँ बितेको र नागरिक पनि त्यसैमा भ्रमित भएको प्रचण्डको टिप्पणी छ । त्यसकारण अहिले सरकारमा जाने कुरा आफ्नो पार्टीको प्राथमिकतामा नरहेको उनको भनाइ छ ।

‘हामीले कहिले काँग्रेससँग सहकार्य, कहिले एमालेसँग, कहिले मधेशीसँग भन्दा भन्दै हाम्रा दिनहरु त्यसैमा बिते । जनता भ्रमित पनि त्यसैमा भए । त्यसकारण अहिले हाम्रो लागि सरकार मुख्य कुरा होइन’, प्रचण्डले भने, ‘हाम्रो लागि साझा न्यूनतम कार्यक्रम बनाउने र आन्दोलनमा जाने कुरा मुख्य कुरा हो । त्यसकारण हाम्रो ध्यान सरकारतिर छैन ।’

सरकारमा भएपछि मात्र वामपन्थी सहकार्य हुने कुरामा आफू सहमत नभएको प्रचण्डको भनाइ छ । यद्यपि संविधान र राजनीति नै अप्ठेरोमा पर्दा आफ्नो पार्टी सहयोग गर्न तयार रहेको उनले स्पष्ट पारे ।