दुई वर्षीया बालिका गरिमा चौधरीको हत्याका मुख्य अभियुक्तका रूपमा सार्वजनिक गरिएका १६ वर्षका नाबालकले बयान दिँदै गरेको  भिडियोले सामाजिक सञ्जालमा सर्वत्र विरोध भइरहेको छ । उक्त भिडियोमा आरोपीसँग प्रहरीको उपस्थितिमा घटनाबारे सोधपुछ भइरहेको देखिन्छ ।

हातमा हत्कडी लगाइएका १६ वर्षका बालकले निर्धक्कसँग आरोप स्वीकार गरेका छन् । तर बालिकामाथि बलात्कार र हत्यामा आफू मात्र नभएर थप एक व्यक्ति संलग्न रहेको उनले बताएका छन् । सिमरा चोकमा घर भएका प्रदीप खड्काको योजना र संलग्नतामा यो सबै भएको उनको दाबी छ ।

उच्च प्रहरी स्रोतका अनुसार सार्वजनिक भएको भिडिओ फेक होइन । आरोपी किशोरलाई पक्राउपछि मेडिकल चेकअपका लागि कलैया अस्पताल लगिएको थियो । अस्पतालभित्र डाक्टर नभएको बेला आरोपी किशोरसँग अनौपचारिकरुपमा कसैले सोधपुछ गरेर भिडिओ बनाइएको स्रोतले बतायो ।

सोधपुछ गर्ने व्यक्तिको अनुहार देखिएको छैन । उनी प्रहरी नभएको स्रोतको दाबी छ । प्रहरीका अनुसार उनी अस्पतालकै स्वास्थ्यकर्मी हुन् र बालकको मानसिक अवस्था जाँच्न सोधपुछ गरेका थिए । भिडिओमा प्रहरीहरू देखिएका छन् । बन्दुक बोकेका प्रहरी र एक सिभिल ड्रेस लगाएका व्यक्तिले मोबाइलबाट भिडिओ खिचेको देखिएको छ ।

भिडिओको सुरुमै सोफामा बसेका प्रहरीले गर्मी लागेको भन्दै एसी चलाउन आग्रह गर्छन् । तर आरोपी बालकले हाँस्दै आफूलाई जाडो लागिरहेको बताउँछन् । त्यसपछि अनुहार नदेखिएका व्यक्तिले घटनाबारे सबै विवरण सुनाएमा खाना खुवाउने आश्वासन दिएका छन् । प्रहरीले पनि लगेर खाना खुवाउने बताउँछन् । त्यसपछि आरोपी बालक घटनाबारे ढुक्कसँग बोल्न थाल्छन् । उनको अनुहारमा न अपराधबोध देखिन्छ, न सम्भावित सजायको त्रास ।

बालकले सुरुमै आफूलाई प्रदीप खड्का नाम गरेका साथीले उक्साएको बताउँछन् । सिमरा बस्ने प्रदीपलाई आफूले गाडीमा लिएर आएको र उसकै योजनाअनुसार बालिकालाई चकलेट दिएर लगेको उनको भनाइ छ ।

उनले भनेका छन्, ‘बच्चाहरू खेलिराख्या थिए । त्यो प्रदीप पनि त्यहीँ थियो । तिनीहरूले हेरिराथ्यो । म चकलेट किनेर आएँ अनि चकलेटको लालच दिएर एउटा घरमा लिएर गएँ त्यसलाई । त्यो घर कसको हो थाहा छैन ।’

बालिकासँग दुवैजनाले पालैपालो आपराधिक हर्कत गरेको आरोपी किशोरले सुनाएका छन् । बालिका बेहोस भएपछि प्रदीप भागेको उनको भनाइ छ । आफूले बालिकालाई त्यही घरमा रहेको डोरीले बाँधेर तन्नामा बेरेको अनि ढोकामा चुकुल लगाएर हिँडेको उनले बताएका छन् ।

प्रहरीले अहिलेसम्म यो घटनामा प्रदीप खड्का नाम लिएको थिएन । पक्राउ पर्ने दोस्रो व्यक्ति प्रोग्रेस चौधरी हुन् । आरोपी बालकले नाम लिएका प्रदीपबारे व्यापक चासो उत्पन्न भएको छ ।

भिडिओ सामाजिक सञ्जालमा आएपछि प्रहरीभित्र पनि आन्तरिक खोजीनिधि सुरु गरेको जनाएको छ । प्रहरी प्रधान कार्यालयले यसमा चासो दिएको बताएको छ ।

जिल्ला प्रहरी कार्यालय बाराका प्रमुख एसपी नरेन्द्र कुँवर र डीएसपी मीनबहादुर घलेसँग समेत सोधपुछ थालिएको स्रोतले जनाएको छ । नेपाल प्रेसका अनुसार संवेदनशील आपराधिक घटनाको अनुसन्धानका क्रममा तयार भएका अडिओ-भिडिओ कसरी सामाजिक सञ्जालसम्म पुगे भन्ने विषयमा साइबर ब्युरोले डिजिटल ट्रेक अनुसन्धान गरिरहेको छ ।

भिडिओमा देखिएका सबै दृश्य र त्यसको वास्तविकताबारे प्रहरीले औपचारिक पुष्टि गरिसकेको छैन । प्रहरीको संवेदनशील अनुसन्धानसँग सम्बन्धित अडिओ–भिडिओ अनधिकृत रूपमा सार्वजनिक हुनु प्रहरीको आन्तरिक प्रोटोकल र अनुसन्धानको गोपनीयतासँग जोडिएको विषय हो ।