गोरखाको चुमनुब्री गाउँपालिका वडा नम्बर ७ छेकम्पारस्थित चौरीखर्क पारि जंगलमा पहिरो खस्दा स्यार खोला आज बिहान केहीबेर थुनिएको छ।

स्यार खोला बूढीगण्डकीको सहायक खोला हो।

स्थानीय होटल सञ्चालक पासाङ लामाका अनुसार पहिरो खस्दा करिब आधा घन्टा स्यार खोलामा पानी कम बगेको थियो। अहिले खोलामा पहिले जस्तै पानी बगेको छ।

‘चौरीखर्कदेखि पारिपट्टी जंगलमा ठूलो पहिरो खसेको हो। हिजोअस्तीदेखि नै पहिरो खसेकोमा आज पहिरो बढ्यो,’ उनले सेतोपाटीसँग भने, ‘आधा घन्टाजति स्यार खोलामा पानी थुनिएको थियो। पानी कम बगेको थियो, अहिले पहिलेजस्तै पानी बग्न थालेको छ। तर स-साना पहिरो खसिरहेको छ। तल्लो क्षेत्रमा रहेकाहरू सतर्क रहनु राम्रो हुन्छ।’

चुमनुब्री गाउँपालिका ७ का अध्यक्ष टसी दोर्जे लामाका अनुसार पहिरो ठूलो गए पनि यसले थप बाढी ल्याउने जोखिम कम छ।

‘पहिरो ठूलो गएको छ तर स्यार खोलाको बगर फराकिलो छ, अहिले कुनै जोखिम छैन,’ उनले भनेका छन्।