काठमाडौं । नेपाली कांग्रेसका महामन्त्री प्रदीप पौडेलले विपत्तिको संवेदनशील घडीमा नागरिकले राज्यको अभिभावकत्व खोजिरहँदा विपद्ग्रस्त क्षेत्रमा सरकारको उपस्थिति निराशाजनक र चिन्ताजनक रहेको बताएका छन्।

उनले भनेका छन्, ‘सामाजिक सञ्जालका पोस्टहरूमा सरकारको जति सक्रियता र दाबी देखिन्छ, वास्तविक जमिनमा उद्धार, राहत र व्यवस्थापनको अवस्था त्यति नै कमजोर छ। विशेष गरी, सुरुङ मार्ग र जटिल भूभागमा फसेका नागरिकको उद्धारमा सरकारले एक्लै सबै गर्छु भन्ने अहम् राखेर बाह्य विशेषज्ञको सहयोग लिन गरेको ढिलाइ सबै भन्दा गम्भीर भूल हो।’

सहज स्थानमा मात्र सरकारको बाक्लो उपस्थिति देखिएपनि मुख्य प्रभावित क्षेत्रमा अझै पर्याप्त सहयोग पुग्न नसकेको उनको भनाइ छ।

दिनरात खटेर काम गर्ने तथा सकारात्मक सुझाव दिनेहरूलाई नै सरकारका मन्त्री र सत्ता समर्थित माननीयहरूबाटै हप्कीदप्की र संवेदनहीन टिप्पणी आउनु झनै आपत्तिजनक भएको उल्लेख गरेका छन्।

उनले भनेका छन्, ‘यस्तो अहम् र प्रचारबाजी त्यागेर, अत्यन्तै संवेदनशील भई तत्काल उद्धार, राहत, घाइतेको शीघ्र उपचार र विस्थापितहरूको उचित व्यवस्थापनमा केन्द्रित हुन सरकारलाई सचेत गराउन चाहन्छु।’