नेपाली कांग्रेसको १५औँ महाधिवेशनअन्तर्गत स्याङ्जामा पहिलो चरणको वडा अधिवेशन सुरु भएको पहिलो दिन ९७ मध्ये ८३ वटा वडामा अधिवेशन सम्पन्न भएको छ ।

संविधान दिवसको अवसर पारेर सुरु गरिएको अधिवेशन जिल्लाका विभिन्न वडामा असोज ३ र ४ गते गर्ने कार्यतालिका तय गरिएको थियो । सोहीअनुसार शनिबार ८३ वटा वडामा अधिवेशन सम्पन्न भएको नेपाली कांग्रेस स्याङ्जाका जिल्ला सचिव दामोदर लम्सालले जानकारी दिए ।

उनका अनुसार बाँकी १४ वटा वडामा आज वडा अधिवेशन हुनेछ ।

जिल्लामा बाँकी रहेका वडामध्ये आँधीखोला गाउँपालिका–४, फेदीखोला गाउँपालिका–२, बिरुवा गाउँपालिकाका वडा नम्बर २, ३, ४, ६ र ८ मा अधिवेशन हुन बाँकी छ ।

त्यस्तै, वालिङ नगरपालिकाका वडा नम्बर ८, १२ र १३, गल्याङ नगरपालिकाको वडा नम्बर ८ तथा चापाकोट नगरपालिकाका वडा नम्बर ६, ८ र ९ मा आज अधिवेशन गर्ने तयारी छ ।

स्याङ्जाका भीरकोट नगरपालिका, अर्जुनचौपारी गाउँपालिका, हरिनास गाउँपालिका, कालीगण्डकी गाउँपालिका र पुतलीबजार नगरपालिकाका सबै वडामा भने पहिलो दिनमै वडा अधिवेशन सम्पन्न भएको कांग्रेसले जनाएको छ ।

वडा अधिवेशनबाट स्थानीय तहमा पार्टीको नयाँ नेतृत्व चयनसँगै १५औँ महाधिवेशनका लागि प्रतिनिधि छनोटको प्रक्रिया अघि बढ्नेछ । बाँकी वडाको अधिवेशन सम्पन्न भएपछि जिल्लाको पहिलो चरणको वडा अधिवेशन पूरा हुनेछ ।