युवा उद्यमी तथा बैंकिङ क्षेत्रका भरतराज ढकालले नेपाली कांग्रेसको १५औँ महाधिवेशनमा केन्द्रीय सदस्य पदमा उम्मेदवारी दिने भएका छन् । स्याङ्जाको आँधीखोला गाउँपालिका–६ फापरथुमका ढकालले खुलातर्फ केन्द्रीय सदस्यमा उम्मेदवारी दिन लागेका हुन् ।

कांग्रेसको केन्द्रीय निर्वाचन समितिले मंगलबार केन्द्रीय पदाधिकारी तथा सदस्यका लागि मनोनयन दर्ताको समय तोकेको छ । ढकालले विद्यार्थी राजनीतिबाट कांग्रेसको राजनीतिमा प्रवेश गरेका हुन् । उनी १०औँ महाधिवेशनदेखि पार्टी राजनीतिमा सक्रिय रहँदै आएका छन् ।

ढकाल लामो समयदेखि बालबालिकाको संरक्षण, वातावरण, सहकारी, बैंक तथा वित्तीय संस्था र कृषि क्षेत्रमा सक्रिय छन् । २०५७ सालमा अनाथ तथा गरिब बालबालिकाको संरक्षणका लागि स्याङ्जामा सहारा बालगृह स्थापना गरेका उनले २०५९ सालमा रोयल सहकारी स्थापना गरी सहकारी अभियानमा काम थालेका थिए ।

त्यसपछि २०६३ सालमा मुक्तिनाथ विकास बैंक स्थापना गरेका ढकाल विगत डेढ दशकदेखि नेपालको वित्तीय क्षेत्रमा सक्रिय छन् । उनी नेपाल पत्रकार महासंघ स्याङ्जा शाखाका संस्थापक सदस्यमध्ये एकसमेत हुन् ।

पछिल्लो एक दशकदेखि मुक्तिनाथ कृषि कम्पनीमार्फत कृषि क्षेत्रमा काम गर्दै आएका ढकालले कृषि उत्पादनको मूल्य शृंखला, बजार विस्तार र रोजगारी सिर्जनालाई प्राथमिकता दिँदै आएका छन् । औद्योगिक विकासका क्रममा वातावरणमा परेको प्रभावबारे राष्ट्रिय तथा अन्तर्राष्ट्रिय मञ्चमा नेपालको पक्षमा समेत आवाज उठाउँदै आएको उनको भनाइ छ ।

जेनजी आन्दोलनपछि कांग्रेसको विशेष महाधिवेशनमा सक्रिय रहेका ढकाल प्रतिनिधिसभा निर्वाचन–२०८२ मा स्याङ्जा क्षेत्र नं. १ बाट कांग्रेसका उम्मेदवारसमेत बनेका थिए । यसपटक भने उनी पार्टीको केन्द्रीय सदस्यमा उम्मेदवार बन्न लागेका हुन् । हालै स्याङ्जा क्षेत्र नं. १ बाट उनी महाधिवेशन प्रतिनिधिमा निर्वाचित भएका छन् ।

ढकालले निजी क्षेत्रले लामो समयदेखि भोग्दै आएका समस्यालाई नीतिगत रूपमा समाधान गर्ने विषयलाई आफ्नो प्राथमिकतामा राखेका छन् । उनका अनुसार बालबालिकाको पोषण, युवाको शिक्षा तथा रोजगारी, ज्येष्ठ नागरिकको स्वास्थ्य र निजी क्षेत्रका समस्यासहित देशको आर्थिक अवस्था सुधारका विषयमा काम गर्न आफूले केन्द्रीय सदस्यमा उम्मेदवारी दिन लागेको हो ।

‘देशको आर्थिक अवस्था सुधारसँगै बालबालिका, युवा, ज्येष्ठ नागरिक र निजी क्षेत्रका मुद्दालाई नीतिगत रूपमा सम्बोधन गर्न आफ्नो क्षमताले भ्याएसम्म काम गर्ने उद्देश्यले उम्मेदवारी दिन लागेको हुँ,’ ढकालले भने ।